Қазір бұл елді мекендерде алкоголь өнімі мүлдем сатылмайды. Нәтижесінде, ауылдардағы ірілі-ұсақты бұзақылық азайып, соңғы 3 жылда бірде-бір қылмыс тіркелмеген. Ал ауыл жастары болса, спортпен шұғылданып, өнерге бет бұрған.

800-ден астам тұрғыны бар Қонысбай ауылында соңғы 3 жылдан бері ащы сусын мүлде сатылмайды. Игі бастаманы жергілікті тұрғындар көтерген. Алдымен ауылда ақсақалдар алқасы құрылып, ішімдіктен бас тарту туралы шешім қабылданған.

Қайдар Бекенов, Қонысбай ауылының тұрғыны:

-Қазақ халқының қаны таза халық екеніне екі себеп бар. Бірі жеті атадан қыз алмау, екіншісі арақ-шарапты ата-бабамыз қолданбаған. Төңіректегі Қызыл сая, Дөңгілағаш, Қанай би елдері осылай арақ-шараптан бас тартып, бізде солардың қатарына қосылғалы 2-3 жыл болды. Қазір ауылда тәртіп бәрі жақсы.

Жергілікті кәсіп иелері де игі жобаға қолдау танытқан. Мысалы, қазір ауылдағы дүкендердің ешбірінде ішімдік саудаланбайды.

Алтыншаш Төлеуова, дүкен сатушысы:

-Табыс төмендеген жоқ. Керісінше, жақсы. Ондай ішімдік неге керек? Міне халыққа осы ғана қажет қой. Күнделікті тауарлар. Қант, май, шай.

Ащы сусыннан бас тартқан ауылдың берекесі де арта түскен. Соңғы жылдары мұнда ауыр қылмыс тұрмақ, бұзақылық дерегі де тіркелмепті.

Серік Әбутәліпов, облыстық ПД бастығының бірінші орынбасары:

-Бүгінгі күнгі нәтижесі 98 ауылда бірде-бір қылмыс тіркелмеді. 30 ауыл ішімдіктен бас тартқан ауылдар бар. Биыл көздеп отырған нақты мәселеміз барлық аудан орталықтары және қалаларда осы қоғамдық кеңесін құрамыз.

Бұдан бөлек, аймақта «Зиялы қауым» жобасы қолға алынған. Оның аясында ауыл қауымдастығы мен полиция қызметкерлері қылмысқа қарсы бірлескен күрес жүргізіп жатыр. Қоғамдық кеңес елді мекендерді абаттандыру, қараусыз жайылатын мал мәселесін шешуде де белсенді.

Абзал Азаматұлы, Виктор Полянный

Upd: 28.03.2025, 20:35