Жағдайдың бұлай ушығуына қарулы қақтығыс пен экономикалық дағдарыс себеп болғанын Анадолы сайты жазды.

Конго Демократиялық Республикасында қазірдің өзінде 28 миллионнан астам адам азық-түлікке мұқтаж, деп хабарлайды inbusiness.kz сайты.

Мұндай жантүршігерлік ақпарат Азық-түлік және ауылшаруашылық ұйымы мен БҰҰ-ның Дүниежүзілік азық-түлік бағдарламасының (WFP) талдауында айтылған.

Деректерден дағдарыс деңгейінде аштықпен бетпе-бет келген адамдардың саны соңғы айларда 2,5 миллионға өскенін байқау қиын емес. 3,9 миллионға жуық адам гуманитарлық апатқа ұшырауы мүмкін.

Әсіресе, елдің солтүстік және оңтүстік Киву, Итури және Танганьика сияқты шығыс провинцияларында жағдай қиындай түскен.

– Конго Демократиялық Республикасындағы гуманитарлық жағдай қорқынышты қарқынмен нашарлап барады. Қазірдің өзінде дастарқанға тамақ қою үшін күресіп жүрген отбасылар бар, – деді WFP Оңтүстік Африка бойынша аймақтық директоры Эрик Пердисон.

Шығыс провинциялардағы 10 миллионнан астам адам дағдарыс немесе төтенше жағдайдағы азық-түлік тапшылығынан зардап шегуде.

БҰҰ мәліметінше, соңғы үш айда негізгі азық-түлік өнімдері саналатын жүгері ұны мен пальма майының құны 37 пайызға қымбаттаған.

– Жағдай өте ауыр. Егін жойылды, бағалар шарықтап барады және миллиондаған адамның жағдайы адам сенгісіз жағдайда тұр, – деді ФАО Конгодағы өкілінің міндетін атқарушы Атман Мравили.

Оның сөзінше, қосымша қаржысыз халықты аштықтан құтқару мүмкін емес.

БҰҰ осы кездің өзінде шұғыл көмек көрсетуді жалғастыруда. 2025 жылдан бері 464 мың адам азық-түлікпен, ақшалай жәрдемақымен қамтылған.