Шаруалар шығыны қалай өтеледі?

Соңғы жылдар елімізде киіктер саны күрт өсіп, шаруалардың егінін таптап, шығынға батырғаны белгілі. Осыған орай Ауыл шаруашылығы министрлігіндегілер киік таптаған жайылымның шығынын субсидиямен толтырудың орынына жайылымдарды тормен қоршау шығындарының пайызын субсидиялауды ұсынып отыр, деп жазады inbusiness.kz сайты.

– Ақбөкендердің жайылымға келтірген залалын объективті бағалау мәселесі бар. Залалды есептеу қиын және сыбайлас жемқорлық тәуекелдері туындауы ықтимал. Әкімшілендірудің күрделілігі және ашық процедуралардың болмауы жергілікті бюджеттің тиімсіз жұмсалуына әкелуі мүмкін, өйткені шөптің мөлшері мен нақты залалды дәл анықтау мүмкін емес, – деп жазылған министрлік мәліметінде.

Жауапты министрлік алқаптарды қоршауды субсидиялау керектігін айтты.

– Ауыл шаруашылығы жерлерін киіктерден қоршауға арналған топсалы торларды қума метрін 700 теңге және топсалы торды бекітуге арналған бағандарды (металл немесе бетон) бір данасын 3 750 теңге сатып алу кезінде инвестициялық салымдарды өтеу үлесі жергілікті бюджет қаражаты есебінен 50% субсидияланады, – деп жазады ведомство мамандары.