Мамандарды даярлау ісі Алматы, Ақтөбе, Тараз және Щучинск қалаларында жүзеге асырылады.

Үкімет басшысы Олжас Бектенов Сенат депутаттарының сауалына берген жауабында Қазақстанда жаңа технология ретінде пилотсыз ұшу аппараттарын (дрон) қолдануға баса мән берілетінін айтты.

Әлемдік тәжірибеде дрондар әскерде қазір кеңінен қолданады.

"Осыған байланысты армияны жоғары технологиялық қару-жарақпен және техникамен, оның ішінде пилотсыз ұшу аппараттарымен жарақтандыруға ерекше назар аударылады. Қазіргі заманғы оқыту технологиясын енгізу жөніндегі шаралар шеңберінде Қорғаныс министрлігі әскери жоғары оқу орындарының білім беру бағдарламаларына курсанттар мен кадеттердің пилотсыз ұшу аппараттарын ұшырып, технологиялық пайдалану негіздерін меңгеруі пәндерін енгізді", – делінген премьер-министрдің жауабында.

Дрон мамандары бүгінде келесі білім беру мекемелерінде даярланады:

• Әуе қорғанысы күштерінің оқу-жаттығу орталығы (Ақтөбе қаласы);
• Құрлық әскерлерінің оқу-жаттығу орталығы (Алматы қаласы);
• Радиоэлектроника және байланыс әскери институты (Алматы қаласы);
• Әскери колледж (Щучинск қаласы);
• Жауынгерлік даярлық және пилотсыз ұшу аппараттарын жауынгерлік қолдану оқу-жаттығу орталығы (Тараз қаласы).

Оқи отырыңыз: ҰҚК шекара қызметіне 270 адам әскери жиындарға шақырылады

"Отандық пилотсыз ұшу аппараттарын жетілдіру үшін Қорғанысмині мамандары оны шығару бойынша кәсіпорындарға кезең-кезеңімен барады, оларды көрнекі түрде көрсету және тәжірибелік-әскери сынау өткізіледі, оның қорытындысы бойынша тиісті ұсынымдар беріледі", – деді Олжас Бектенов.