Бұл оқиғаға байланысты қылмыстық іс қозғалды.

Әлеуметтік желілерде шетелдік көлік жүргізушілерінен 200 мың теңге сұраған полицейлердің әрекеті жайындағы видео кеңінен тарады, деп жазады inbusiness.kz сайты.

Видео авторының айтуынша, тәртіп сақшылары туристердің көлігін жолда тоқтатып, құжаттарын тексерген. Көліктің Қазақстанда техникалық тексеруден өтпегені үшін пара талап еткен.

Сондай-ақ, полицейлер шекараға дейін көліктерді ешкім тоқтатпайтынын айтқан.

Түркістан облысы полиция департаментінің баспасөз қызметі аталған жағдайға қатысты қылмыстық іс қозғалғанын хабарлады.

Әлеуметтік желілерге мониторинг жүргізу барысында патрульдік полиция қызметкерлерінің "Шымкент – Самара" тасжолындағы әрекеттері анықталды. Қазіргі уақытта бейнежазба бойынша тексеру жұмыстары жүргізілуде.

Айта кету керек, полицияға жәбірленушілерден ресми арыз-шағым түспеген, көлік құралының мәліметтері анықталмады. Ішкі істер министрлігі құқық қорғау органдарына деген сенімді төмендететін кез келген ақпаратқа назар аударып, нақты әрі қатаң жауап беретінін мәлімдеді.

Бұл факті бойынша қылмыстық іс қозғалды, — деп көрсетілген ведомствоның ақпаратында.

Сонымен қатар, аталған жағдай бойынша тиісті құрылым басшылығына қатысты қызметтік тергеу басталды.

Кінәлілер заң бойынша жауапқа тартылады. Мұндай жағдайлардың алдын алу мақсатында патрульдік нарядтардың жұмысын бақылау күшейтілді. Министрлік сыбайлас жемқорлыққа қарсы күрес және тазарту шараларына басымдық беріп, тұрғындарға белсенді азаматтық ұстанымдары үшін алғыс білдіреді. Сонымен қатар, диалогқа ашық екенімізді хабарлаймыз, — делінген ведомство хабарламасында.