Қос спортшы да кәсіпқой бокстағы алғашқы жекпе-жегіне дайындалуда .

Бокс кеші 5 сәуірде Астана қаласында өтеді деп жоспарланған, деп жазады inbusiness.kz сайты.

Qsport.kz сайты Махмұд және Төрехан Сабырхандардың қарсыласы анықталғанын хабарлап отыр.

Махмұд Сабырхан колумбиялық Николас Тордесильямен жұдырықтасады. Ол да – кәсіпқой боксты жаңа бастаған спортшы. Әзірге екі жекпе-жек өткізген, 100 пайыздық жеңіске ие.

Ал, Төрехан Сабырхан 29 жастағы Джири Хаукемен шаршы алаңға шығады. Қарсыласы бұған дейін 10 кездесу өткізіп, 4-еуінде ғана жеңіске жеткен.

Екі былғары қолғап шеберінің де жекпе-жегі 6 раундқа жоспарланған, әр раунд 3 минутқа созылады.

Астанадағы бокс кешінің басты кездесуі – Жәнібек Әлімханұлы (16-0) мен француз Анауэль Нгамиссенгудің (14-0) жекпе-жегі.

Бұған дейін Сабырхандардың біріне қатысты "Қазақтың қос мықты боксшысы бір салмақта жұдырықтаспақ" деген тақырыпта мақала жариялаған едік.