Құжат 53 тармақтан тұрады.
Мемлекет басшысы Қасым-Жомарт Тоқаев Ұлттық құрылтайдың IV отырысында көтерген бастамаларды жүзеге асыру туралы жоспарға қол қойды. 53 тармақтан тұратын бұл құжатты Президент әкімшілігі Үкіметпен бірлесіп әзірлеген. Мемлекеттік кеңесші Ерлан Қарин жоспарда нақты қандай қадамдар көзделгеніне өз Telegram арнасында шолу жасады.
Оның сөзінше, жоспар президенттің гуманитарлық және әлеуметтік-экономикалық салалардағы тапсырмаларын орындауға қатысты нақты шараларды қамтиды.
Мемлекет басшысының гуманитарлық бастамаларын жүзеге асыру үшін:
- "Қазақстан балалары" бірыңғай бағдарламасын әзірлеу;
- Ішкі саясат тұжырымдамасын әзірлеу және бекіту;
- Нашақорлыққа және есірткі бизнесіне қарсы күрестің 2026-2028 жылдарға арналған жаңа кешенді жоспарын қабылдау,
- Ұлттық цифрлық архив құру;
- бизнес өкілдерін тарта отырып аймақтарда театрларды салу және дамыту, сондай-ақ ұлттық театрларға қолдау көрсету;
- Шетелде Абай институтын ашу;
- Халықаралық биологиялық әралуандықты қорғау қорын құру қарастырылған.
Оқи отырыңыз:
- Мемлекет басшысы ақыл айтып ақша табатын психологтар мен коучтарды сынға алды
- "Пікірталасты доғару қажет". Мемлекет басшысы бірыңғай уақыт белдеуі туралы
Ал әлеуметтік-экономикалық жобалар қатарында:
- "Жайлы мектеп" ұлттық жобасын жүзеге асыруды жалғастыру, үш жылда 1300 мектепті жаңғырту;
- ерекше қажеттілігі бар адамдарға арналған заманауи оңалту орталықтарын ашу, әрбір облыс орталығында ерекше қажеттілігі бар балаларды оңалту және дамыту орталықтарын құру;
- Өңірлерді дамыту тұжырымдамасына қатысты тың тәсілдерді енгізу;
- 2025-2026 жылдары ірі инфрақұрылымдық жобаларды жүзеге асыру, соның ішінде Астанадан Арқалық, Торғай және Ырғыз арқылы Транскаспий халықаралық көлік дәлізіне тура шығатын автокөлік жолын салу және жаңғырту, Арқалықтағы әуежайды қалпына келтіру және жаңа аэровокзал кешенін салу;
- алдағы төрт жыл ішінде елімізде жыл сайын 200-ге жуық инвестициялық жобаны іске қосу жұмыстары бар.
"Сонымен қатар шекара маңындағы аудандарды дамыту, ғылым қалашықтарын құру, ерекше қажеттіліктері бар балаларды кешенді қолдау, үкіметтік емес ұйымдар және мемлекеттік әлеуметтік тапсырыс туралы жеке заңдар қабылданады. Жалпы, Президенттің Ұлттық құрылтайдың IV отырысында көтерген бастамалары мен берген тапсырмалары мемлекеттік органдар үшін де, бүкіл қоғам үшін де еліміздің ұзақ мерзімге арналған даму бағдарын айқындайды", – деп жазды Ерлан Қарин.
