2025 жылдың 29 мамырында зардап шеккен тараптың адвокаттары Шерзат Полаттың өліміне екі қыздың қатысы барын айтып, соттан осыны ескеруді сұраған, деп хабарлайды Zakon.kz.

Адвокат Мейірман Шекеев куәгерлер Эльмира Нұрбекова мен Дана Жақсыгелді сотқа жалған айғақ беріп, процеске қатысушыларды жаңылыстырғанын және айғақ беруде шатасып қалғанын айтты. Іс материалдары, көліктегі аудио және бейнежазба олардың Шерзат Полатты өлтіруге тікелей қатысы барын растайды.

"Эльмира Нұрбекова сотқа дейінгі тергеу барысында Шерзат Полатты кім пышақтап кеткенін көрмегенін айтты. Содан кейін ол не жазылғанын түсінбегенін айтып, алғашқы айғақтарынан бас тартты. Алайда сотта ол қазақ тілін жақсы білетінін көрсетті. Сондай-ақ ол полицияның қысым көрсеткенін айтты, бірақ мұны ештеңе растамайды.Аудио-бейне жазбаларды зерделей келе, оның қазақша еркін сөйлейтініне көз жеткіздік. Оның жанында үнемі телефон болатын. Ол оқиға орнында болған және олар бірге жоғалып кеткен. Көлікте Нұрбекова сотталушылармен әңгімелеседі, қалжыңдайды, күледі, болған оқиғаға қатысты өз ойын білдіреді. Оған ешкім қысым көрсетпегені анық." Мейірман Шекеев

Адвокат қыздың сот алдында шындықты айтуға ант бергенін атап өтті. Осыған байланысты ол жалған айғақ беру және ауыр қылмыс туралы хабарламағаны үшін шара қолдану үшін іс материалдарын Алматы облысының прокурорына жіберуді сұрады. Дәл осындай петиция Дана Жақсыгелдіге де қатысты.

Бұл өтінішті тіпті кейбір айыпталушылардың адвокаттары қолдап, олардың клиенттерінің оқиғаға азырақ қатысы бар екенін, бірақ әлі де сотта отырғанын алға тартты. Сот өтінішті кеңесу бөлмесінде қарайды.

Айта кетейік, қыздар сотта қайғылы оқиғадан бір күн бұрын Шерзат Полат ісі бойынша сотталушылардың кейбірімен кездескендерін айтқан болатын. 2024 жылдың 3 қазанында, яғни төбелестің қарсаңында олар дәмханада бірге демалып отырған. Сосын екеуі Талғардағы Қамажай дүкеніне бірге барды.

2024 жылдың 4 қазанында Талғарда жаппай төбелес болып, оның барысында 16 жастағы жасөспірім Шерзат Полат пышақ жарақатынан қайтыс болды. Қоғамдық резонанс тудырған жасөспірімді өлтіру дерегі бойынша ҚР Қылмыстық кодексінің бес бабы бойынша тергеу жүргізіліп, 11 күдікті қамауға алынды.

2025 жылдың 10 сәуірінде Шерзат Полаттың өліміне қатысты іс бойынша алдын ала тыңдау өтті.

2025 жылдың 17 сәуірінде сот басты сот талқылауын бастады. Прокурор Шерзат Полаттың қалай өлтірілгенін айтып берді.