Қостанай қаласының маңында балаларға арналған заманауи лагерь немесе демалыс орындары мүлдем жоқ.

Биыл 200-ге жуық оқушы үшінші жыл қатарынан Көкшетауға барады, деп жазады inbusiness.kz сайты "Наша газета" порталына сілтеме жасап.

Сондай-ақ, ерекше қажеттілігі бар 200 бала өңірдегі "Хатико" оңалту орталығында демалса, 1000-нан астам бала мектеп лагерінде тегін аспен қамтылады. Бұл – өңір үшін өте аз көрсеткіш. Сондықтан қала сыртындағы ескі лагерді қалпына келтіру мүмкіндігі қарастырылып жатыр. Ал, Қостанай облысы бойынша барлығы 12 лагерь бар. Мұнда биыл 8 мыңнан аса оқушы демалады деп жоспарланған.

"Қала сыртындағы "Нива" лагері Алтынсарин және Қостанай аудандарының шекарасында орналасқан. Ол Қостанай облысы полиция департаментінің теңгеріміне берілген. Онда полицейлер оқу-жаттығу жиынын өткізуді жоспарлаған. Өткен жылы полиция департаменті білім басқармасына лагерьді облыс әкімдігінің қарамағына қайтару туралы ұсыныс жіберген. Неге екенін білмеймін, бірақ бұл ұсыныс орындалмады. Лагерь әкімдік қарамағына өтсе де оны күрделі жөндеуден өткізуге қыруар ақша қажет", – дейді Қостанай облыстық білім басқармасы, тәрбие ісі жұмысы жөніндегі жетекшінің міндетін атқарушы Қаламқас Қаратаева.

Демек, қала сыртындағы лагерде демалыстың ауылы алыс. Полиция департаментінен әкімдік теңгеріміне қайтарылса, нысан толық зерттеліп, жобалық сметалық құжаттар тағайындалады. Қажетті қаражат құжат рәсімдеген соң белгілі болмақ.