Mecenat .kz әдеби байқауы мәресіне жетті, деп хабарлайды 24kz.

Биыл бұл жоба төртінші жыл қатарынан ұйымдастырылып отыр. Мақсаты – үздік авторды анықтап, ай сайынғы қаламақы тағайындау. Бүгін бас қалада байқау жеңімпазын марапаттау рәсімі өтті.

Шернияз Жалғасбекұлы, тілші:

- Ақтөбелік жазушы Әлихан Жақсылық «Тургенов көшесіндегі үй жұмысқа қабылдайды» атты романның авторы. Оның мифологиялық сарында жазған шығармасы биылғы Mecenat.kz байқауда бәйгелі болды. Ол осы шығармасы үшін енді өмір бойына ай сайын 500 доллар көлемінде сыйақы алады.

Әлихан Жақсылық, жазушы:

- Роман Тургенов көшесіндегі үй жұмысқа қабылдайды. Бұл кәдімгі еңбек адамдары, жұмысшылар туралы. Еңбек адамдарының күнделікті тіршілігі, олардың қалай табыс табатыны, оны қалай жұмсайтыны жайлы. Фэнтези жанрында жазылған. Мұнда тек адамдар ғана рөл атқармайды, түрлі мақұлықтар мен жан-жануарлар да өз ой-пікірін білдіріп, басшыларымен сөйлесіп, қарым-қатынасқа түсіп, жауап бере алады.

Әлиханнан бөлек байқауға 20 қаламгер қатысты. Оның тоғызы туындысын қағазға қазақ тілінде түсірген. Қалған 12 автор өз өнімін орыс тілінде жазды. Ал жүзден жүйрік жазушыны халықтың өзі анықтады. Байқауда бас-аяғы 1738 адам дауыс беріп, оның 600-ден астамы ақтөбелік жазушыны үздік деп таныған.

Бұл уақытқа дейін «Күлпет», «Өлгендер қайтып келмейді», «Өмір бәйтерегі» атты романдар оқырманның жүрегіне жол тауып, Шархан Қазығұлов, Тұрысбек Сәукетаев, Сәуле Досжан секілді қаламгерлер жеңімпаз атанған еді.

Тимур Турлов, жоба демеушісі:

- Біз өте қуаныштымыз, себебі біздің бастамамыздың арқасында көптеген авторлардың тың туындылары насихатталып жатыр. «Жобаны қолдау туралы шешім біз үшін кездейсоқ жағдай емес. Бұл мәдениетті, білім беруді және адам әлеуетін дамытуды қолдауға бағытталған ұзақ мерзімді стратегиямыздың бір бөлігі. Біз шығармашылыққа қаржы құюды болашаққа инвестиция деп санаймыз. Себебі мықты қоғам мықты идеядан басталады. Ал әдебиет қашан да ой-пікір қалыптасатын, құндылықтар туатын және бағыт-бағдар беретін кеңістік болған, болып қала береді де.

Қазақстандық қаржыгер қарымды қаламгерлерді қолдау қарқын алатынын айтады. Олардың еңбектері түрлі тілдерге тәржімаланып, басылады. Тың туындылар таспалануы да мүмкін.

Авторлары: Шернияз Жалғасбекұлы, Самат Оспанов