Қазақстан 2025 жылдың маусым-тамыз айлары аралығында Тәжікстан су қоймасынан 490 миллион текше метрден астам су алады, деп хабарлайды Zakon.kz.

Бұл туралы бүгін, 2 маусымда ҚР Су ресурстары және ирригация министрлігі хабарлады.

"Қазақстанның Су ресурстары және ирригация министрі Нұржан Нұржігітов, сондай-ақ Тәжікстан мен Өзбекстанның су ведомстволарының басшылары 2025 жылдың маусымынан тамызына дейін "Бахри Точик" су қоймасын бірлесіп пайдалану жөніндегі хаттамаға қол қойды. Вегетациялық кезеңнің ең қызған уақытында Қазақстанға 491 млн текше метр су жіберіледі деп күтіліп отыр", – деп жазылған ресми ақпаратта.

Құжатта су қоймасының жұмыс кестесі көрсетілген. Ол үш ел арасындағы суды тиімді әрі теңдей бөлуге бағытталған.

Министрлердің кездесуі мен хаттамаға қол қою рәсімі Душанбеде, мұздықтарды қорғау жөніндегі халықаралық конференция аясында өтті.

"Біз үшін ең маңызды бағыттардың бірі – елдеріміз арасындағы ынтымақтастықты нығайту. Қазақстан су ресурстарын басқару бойынша бірлескен жобаларды жүзеге асыруға, сондай-ақ халықаралық су құқығы қағидаттарын ілгерілетуге ұмтылады. Су – жай ғана табиғи ресурс емес, ол – тұрақты даму мен өңірлік тұрақтылықтың құралы. Біз тек ынтымақтастық арқылы ғана климаттық сын-қатерлерге тиімді қарсы тұра аламыз", – деді ҚР Су ресурстары және ирригация министрі Нұржан Нұржігітов.

2025 жылдың 5 сәуірінде Өзбекстаннан Қазақстанға миллиардтаған текше метр су келгені белгілі болды.