Шерзат Полатты өлтірді деп айыпталған Абзал Шынасыл 23 жылға бас бостандығынан айырылуы керек. Қайғылы жағдайға қатысты Талдықорғанда өтіп жатқан сот отырысында прокурор Дана Сәрсенбай судьядан басты сотталушыға осындай жаза беруді сұрады, деп хабарлайды 24kz.

Мемлекеттік айыптаушы тергеу құжаттарын саралай келе: «Адам өлтіруге оқталды» деген Равиль Сәкиев 20 жыл, бұзақылық бабы бойынша Азамат Тоқтаубаев 15 жылға, Нұрқияс Ілиясов 9 жылға сотталуы керек», — деді. Ал, Дархан Әскентай, Шыңғыс Белғожаев, Нұрбол Тоқтаубаев, Дидар Қалиахметті 7 жылға, кәмелет жасына толмаған жасөпірімді бір жарым жылға бас бостандығынан айыру қажет екенін атап өтті. Осылайша, қатыгездікпен жасалған қылмысқа қатаң жаза тағайындалуы тиіс екенін айтты. Сонымен қатар куә Эльмира Нұрбекова мен Дана Жақсыгелдіге жалған жауап бергені үшін, Арлан Қазыкенов пен Юлдаш Розыбакиевке көліктегі әңгімені жасырғанына байланысты жеке сот қаулысын шығарып, Алматы облыстық ПД жолдау туралы өтініш жасады.

Дүйім жұрттың жағасын ұстатқан жағдайға қатысты сот отырысы аяқталуға жақын. Қазір тараптар жарыссөзге шығып, қорытынды пікірлерін айтып жатыр. Сотталушылардың адвокаттары жаза мерзімімен келіспеді.