Қазақстанда мас күйде көлік жүргізу деректері 14 пайызға азайған.

Ішкі істер министрі Ержан Сәденов мәжіліс депутаттарының сұрауына орай, мас күйде көлік жүргізгендерге жазаны жеңілдетуге қатысты жауап берді.

Еске салайық, "Ауыл" партиясы фракциясының депутаттары мас күйде көлік жүргізгендерді жүргізуші куәлігінен 7 жылға айырудың әлемдегі ең қатал жазалардың бірі екенін айтып, оны жеңілдетуді сұраған болатын. Депутаттар бұл ретте көлік жүргізушісі болып жұмыс істейтіндердің табыс көзінен айырылатынын алға тартқан болатын.

Бұл орайда министр Ержан Сәденов Ішкі істер министрлігінің бұл мәселе бойынша ұстанымын айтты.

Оның сөзінше, автокөлікті мас күйінде басқару жүргізушінің өмірі мен денсаулығына ғана емес, жол жүрісінің басқа заңға бағынатын қатысушыларына да қауіп төндіреді.

"Осылайша мас күйінде автокөлікті басқару үшін қолданыстағы жауапкершілік шаралары жол берілген бұзушылыққа мөлшерлес және заңға бағынатын мінез-құлықты қалыптастыруға және Заң мен Тәртіп қағидатын сақтауға ықпал етеді деп санаймыз. 2023 жылғы 27 қазанда Қазақстан Республикасы Конституциялық сотының №34-НП нормативтік қаулысымен ӘҚБтК-нің 608-бабының бірінші бөлігі тиісті Конституцияға сәйкес және азаматтардың қандай да бір құқықтарын бұзбайды деп танылды. Осыған байланысты ІІМ қолданыстағы санкцияларды сақтау мақсатқа сай деп ұйғарады", – деп жауап берді Ержан Сәденов.

Министр ұсынған мәліметке сәйкес, Қазақстанда 2019 жылдан бері мас күйінде автокөлікті басқару фактілерінің саны 14% (28 801-ден 24 786 фактіге дейін), ЖЖҚ бұзушылықтардың жалпы санында "мас күйінде жүргізудің" үлес салмағы – 1,5 есе (1,01-ден 0,65% дейін), ал мұндай құқығынан айырылған адамдардың мас күйінде автокөлікті қайта басқаруы 2 есе (2510-нан 1276 фактіге дейін) азайған.

Оқи отырыңыз: Астанада жүк көлігі мектеп оқушысын қағып кетті