Қазақстан Республикасы Ұлттық Банкінің Ақша-кредит саясаты комитеті базалық мөлшерлемені +/- 1 п.т. дәлізімен жылдық 16,5% деңгейінде белгілеу туралы шешім қабылдады. Шешім қабылданғанда нақты деректерді, жаңартылған болжамдар мен инфляциялық тәуекелдердің балансын бағалау барысы ескерілді, — деп хабарлайды Massaget.kz тілшісі.

Ақпанда инфляция 9,4%-ға дейін жеделдеп, барлық негізгі көрсеткіштер бойынша бағаның өсуі байқалды. Қызметтер құнының қымбаттауы айтарлықтай әсер етті. Сонымен қатар, тұтынушылық несие беру қарқыны 33,5%-ға өсіп, ішкі сұраныстың артуына ықпал етті. Халықтың инфляциялық күтулері де 13,7%-ға дейін көтерілді.

Сыртқы факторлар да инфляцияға қысым жасап отыр. Ресейдегі инфляцияның жеделдеуі, әлемдік азық-түлік бағасының жоғары болуы және геосаяси тәуекелдер жағдайды күрделендіруде.

Болжам бойынша, 2025 жылы инфляция 10-12%, 2026 жылы 9-11% аралығында қалыптасады. 2027 жылы тежеуші ақша-кредит саясаты мен фискалдық ынталандыруды қысқарту есебінен 5,5-7,5%-ға дейін төмендеуі күтіледі.

Экономикалық өсім 2025-2026 жылдары 4,2-5,2% деңгейінде болжануда. Мұнай өндірісіне қатысты Үкімет болжамының төмендеуі өсу қарқынына әсер етті. Дегенмен, ішкі сұраныстың оң динамикасы мен құрылымдық реформалар экономикалық тұрақтылықты қолдауға ықпал етеді.

Ұлттық банк базалық мөлшерлемені көтеру арқылы инфляцияны бақылауда ұстауға, халықтың табысының сатып алу қабілетін сақтауға және теңгеге деген сенімді нығайтуға бағытталған саясат жүргізуде. Бұл шешім болашақта мөлшерлемені одан әрі арттыру қажеттілігін азайтып, инфляцияны тұрақтандыруға ықпал етуі тиіс.

Өзекті жаңалықтарды өз уақытында оқу үшін Facebook парақшамызға жазылыңыз!