Құқықбұзушылықтар болған жағдайда құзырлы органдарға жүгіну керек деп отыр.

Қорғаныс министрінің орынбасары Шайх-Хасан Жазықбаев әскерге шақыру науқаны уақытылы өтіп жатқанын айтты, деп хабарлайды inbusiness.kz сайты.

Тілшілер көшеде жүрген балаларды әскерге әкету қаншалықты заңды деп сұрады.

"Біз, Қорғаныс министрлігі, шақырту уақытын аяқтап қалды. Қазір жүріп жатқаны Ішкі істер министрлігінің Ұлан қатарына шақыруы. Бұған кешенді қарау керек. Біз осы уақытқа дейін Қазақстан азаматтарын заң жүзінде ешқандай жазаға тартқан жоқпыз. Оның ішінде айыппұл салу мәселесі де бар. Қазір шақыру науқаны уақытылы өтіп жатыр. Бұл жерде менің барлық жас жігіттерге айтарым – әскерден қашпау керек. Әскерден қорықпау керек, әскери дайындықтан өту керек және уақыты келгенде Отанды қорғауға дайын болу керек", — деді Қорғаныс министрінің орынбасары Шайх-Хасан Жазықбаев Мәжіліс кулуарында.

Сөзінше, егер де бір заңбұзушылық болса, құзырлы органдарға шағым жасауға болады.

Вице-министр әскерде тәртіп бар екенін айтты.

"Бірақ бес саусақ бірдей емес. Түрлі күштік құрылымдарда 100 мың адам бар. Әртүрлі адамдар. Тәртіп бұзылған жағдайда, олардың бәрі заңды түрде жазаланады", — деді Шайх-Хасан Жазықбаев.