Ресей Федерациясы Сыртқы істер министрлігінің Ақпарат және баспасөз департаментінің директоры Мария Захарова Қазақстан мен Ресейдің Мәңгілік достық аллеясының ашылуына қатысты пікір білдірді, деп хабарлайды Zakon.kz.

"Қазақстанның әсем де қарқынды дамып келе жатқан Астанасының дәл жүрегінде жаңа, жарқын қалалық нысанның пайда болуы – екі ел арасындағы одақтастық қатынастар мен интеграциялық байланыстардағы маңызды оқиға, әрі Ресей мен Қазақстан арасындағы көпжақты ынтымақтастықтың өзіндік географиялық бастауы болды", – деді ол.

Захарованың айтуынша, салтанатты рәсім барысында екі елдің мәдениет министрлері Қазақстан мен Ресей халықтарының мызғымас бауырластық байланыстарын, олардың тарихи бірлігі мен рухани тұтастығын ерекше атап өтті.

"Екі тарап та ресейліктер мен қазақстандықтарды жақындастыратын бірлескен жобаларды, соның ішінде мәдениет пен өнер саласындағы ынтымақтастықты жалғастыру қажеттігін атап өтті", – деді Захарова.

2025 жылғы 28 мамырда Астанада Қазақстан мен Ресейдің тарихи және мәдени байланыстарының, одақтастығы мен тату көршілігінің символы болып табылатын Мәңгілік достық аллеясының ашылу салтанаты өтті. Ашылу рәсіміне ҚР мәдениет және ақпарат министрі Аида Балаева және Ресей мәдениет министрі Ольга Любимова бастаған ресейлік делегация қатысты.