Ол еліміздегі цифрландырылу деңгейін жоғары бағалады.

inDrive компаниясының негізін қалаушы Арсен Томский цифровизацияның негізгі мәселелерін атады, деп хабарлайды inbusiness.kz сайты.

Сенат төрағасы Мәулен Әшімбаев Taldau Talks подкастында Арсен Томскийден Қазақстандағы цифровизацияның дамыған бағыттар мен негізгі мәселелері қандай екенін сұрады.

"2023 жылға дейін 4 жылдай АҚШ-та тұрдым. Қазақстанда цифровизация бойынша бәрі айтарлық деңгейде жақсы екенін айту керек. Мәселен, АҚШ-та бір құжат алу үшін бір күн кететін. Ал мына жақта құжаттарды бірден алуға болады. Қазақстандағы цифрландырылу деңгейін он баллдан 9,5 балл дер едім. Министрлік бұл бағытта белсенді жұмыс істеп жатыр", – деді inDrive басшысы.

Арсен Томскийдің сөзінше, цифрлық дербестік мәселесіне ден қойғаны жөн.

"IT дегеніміз бір ғана компания бүкіл халықты өз сервисін қолдануға мәжбүрлей алатын сала. Осы арқылы олар адамдардың ойлауына да әсер ете алады. Мұны заманауи отарлаудың жаңа түрі деуге келеді. Себебі, егер бір компания белгілі бір салада монополияға айналса, ол жоғары комиссия ала бастайды", – деді ол.