Бұрынғы денсаулық сақтау вице-министрі Олжас Әбішев үш жыл бұрын өзі және оның бұрынғы басшысы Елжан Біртановтың сотталуына негіз іске басқаша қырынан қарауға сеп болатын дәлелдері барын айтты, деп хабарлайды Zakon.kz.

Әбішев жалғыз куәгердің берген айғақтарына сүйену дұрыс емес екенін және оны дәлелдеуге де дайын екенін жеткізді.

"Жақында біз сол куәгердің қолы қойылған, оның сотта берген айғақтарына мүлдем қайшы келетін құжаттар мен хаттамаларды таптық. Яғни, платформа жұмыс істеп, өз жұмысын ары қарай жалғастыруда. Біз Бас прокурорға жаңа фактілерді ескере отырып, аталған істі қайта қарауға өтініш білдірдік. Барлық дәлелдерді көрсетуге дайынбыз", — деді Әбішев Facebook-тегі парақшасында жарияланған видеода.

2023 жылы 10 ақпанда апелляциялық сот Біртанов пен Әбішевтің үкімін өзгеріссіз қалдырды. Олар өмір бойы мемлекеттік қызметте қызмет ету құқығынан айырылды. Сондай-ақ олар Денсаулық сақтау министрлігінің пайдасына 1,3 млрд теңге шығын сомасын өтеуге міндеттелді.

Біртанов пен Әбішевті хорватиялық Ericsson Nicola Tesla компаниясы құрған ақпараттандыру платформасын қабылдау және қолданысқа енгізуде лауазымдық өкілеттіктерін асыра пайдаланды деп айыпталды.