Қостанайда жас жігітті күшпен әскери комиссариатқа апармақ болған сәт түсірілген видео әлеуметтік желіде тарады, деп хабарлайды Skifnews.kz ақпарат порталы.

Кадрлардан полицей мен азаматтық киімдегі адамның жігітті баспалдақтың тұтқасынан зорлықпен ажыратуға тырысқанын көруге болады. Жас жігіт барғысы келмей, жанұшыра қарсылық көрсеткен.

Оқиға 6 маусым күні кешкі уақытта, жігіт жұмыстан шыққан сәтте болған. Оның әріптестерінің айтуынша, белгісіз үш адам жақындап, өздерін таныстырмастан күш қолданып, жігітті ұстап әкеткен.

“Қызметтік куәліктерін көрсетпеді. Біздің қызметкерлерді итеріп, боқтады. Заңгеріміз келгенше күтпей, оны күшпен көлікке салып алып кетті” – дейді куәгерлер.

Қостанай облыстық полиция департаментінің баспасөз қызметі бұл жайт бойынша қызметтік тексеріс басталғанын хабарлады. Тексеру нәтижесіне қарай полиция қызметкерлерінің әрекетіне құқықтық баға берілетін болады.