Португалия – Ұлттар Лигасының жеңімпазы. Бірер сағат бұрын чемпиондық атақ үшін Португалия және Испания құрамалары кездесті. Финалдық матчты көпшілік тағатсыздана күткен болатын. Сәйкесінше Мюнхен қаласында өткен кездесу аса тартысты болды және негізгі уақыт 2:2 есебмен аяқталды. Ал матч соңындағы пенальтилер сериясында Криштиану Роналду бастаған Португалия жігіттерінің жолы болды.

Бокстан халықаралық турнир өтіп жатыр

Сағындық пен Сабыржан жеңілді. Абылайхан мен Ерасыл жеңді. Нидерландыда бокстан халықаралық турнир жалғасып жатыр. Жарыстың кезекті күні жеті боксшымыз шаршы алаңға шықты. Араларынан 70 келідегі Абылайхан Жүсіпов бельгиялық қарсыласын айқын басымдықпен жеңді. Артынша 80 келідегі Ерасыл Жақпеков даниялық, ал 85 келідегі Дәулет Төлемісов тағы бір бельгиялық боксшыдан басым түсті. Аса ауыр салмақтағы Нұрлан Сапарбай Жоноби Идрис есімді бельгиялық былғары қолғап шеберімен жолығып, төрешілер шешімімен жеңіске жетті. Ал 65 келідегі Ертуған Зейнуллинов әзербайжандық қарсыласына есе жіберсе, 75 келідегі Сабыржан Аққалықов пен 90 келідегі Сағындық Тоғамбай, сәйкесінше Украина және Өзбекстан боксшыларынан жеңілді. Сонымен, жалпы айтар болсақ, жарыс жолында 10 боксшымыздың бесеуі қалды. Яғни Даниял Сәбит, Абылайхан Жүсіпов, Ерасыл Жақпеков, Дәулет Төлемісов және Нұрлан Сапарбай енді алтын жүлдені сарапқа салады. Нидерландыдағы турнир жігіттердің тәжірибе жинап, шеберлік шыңдауына жақсы мүмкіндік. Өйткені алда маңызды бәсекелер келе жатыр. Атап атйқанда, шілдеде Астанада Әлем кубогы, ал қыркүйекте Ливерпульде Әлем чемпионаты өтеді.

Азия чемпионатында топ жарды

Қоржынымызда жеті медаль. Оның үшеуі алтын. Оңтүстік Кореяның Чечхон қаласында спорттық гимнастикадан жасөспірімдер мен ересектер арасындағы Азия чемпионаты аяқталды. Нәтижесінде қазақстандық спортшылар 7 мәрте жеңіс тұғырына көтерілді. Әсіресе ересектер арасында Нариман Құрбанов ең үздік нәтиже тіркеді. Ол ат снарядындағы жаттығуда әлемдегі ең күрделі комбинацияны орындап, 14.933 ұпай жинады. Осылайша Нариман өзінің кәсіпқой мансабында үшінші рет Азия чемпионы атанып отыр. Бұған қоса жасөспірімдер арасында Роман Хегай ат снарядында, ал Нұртаң Ыдырысов сырық дисциплинасында алтын жүлдеге қол созды. Күміс жүлдеге Милад Карими мен Нұртаң Ыдырыс қол жеткізді. Ал командалық көпсайыста қос қола жеңіп алдық. Яғни Қазақстан ересектер және жасөспірімдер құрамасы үздік үштікті түйіндеді. Енді бірер күннен кейін дәл осы Чечхон қаласындағы әйелдер арасындағы бәсекелер басталады.

Нариман Құрбанов, Азия чемпионы:

- Бұл алтын жүлденің орны бөлек. Жалпы Азия құрлығында топ жару оңай емес. Өйткені бәсекелестік өте жоғары. Жарыс барысында әлемдегі ең күрделі элементтердің бірін орындап, тәуекелге бардым. Соның арқасында жеңіске жеттім. Айта кету керек, Бұл Париж Олимпиадасынан кейінгі алғашқы ірі жарысым саналады.

Қазақстан-Солтүстік Македония матчына дайындық

Македониядан ұтылсақ, жағдай қиындайды. Бүгін Астанада өтетін матчқа қатысты футбол мамандары осындай пікір білдіріп жатыр. Айта кетейік, 2026 жылғы әлем чемпионатына іріктеу кезеңі аясында елордада Қазақстан және Солтүстік Македония құрамалары кездеседі. Қазір қос елдің аяқдопшылары матч алдындағы жаттығуды пысықтап жатыр. Қазақстан құрамасы бұған дейін сырт алаңда Уэльтен жеңіліп, Лихтенштейді жеңген болатын. Ал Солтүстік Македония құрамасы Лихтенштейді жеңіп, Уэльс және Бельгия құрамаларымен тең түсті. Сәйкесінше қазір Қазақстан еншісінде 3, ал Македония еншісінде 5 ұппай бар. Соныдықтан Әли Әлиев баптайтын біздің жігіттер бүгін қалай да ұпай алып қалуы қажет. Әйтпесе турнир тізіміндегі жағдай қиындайын деп тұр.

Волейболдан аймақтық ашық турнир

Спорттық жарыстарды ірі қалалар мен облыс орталықтарында ғана емес, ауылдарда өткізу қолға алынып келеді. Мәселен, Ақмола облысына қарасты Жантеке ауылында волейболдан аймақтық ашық турнир өтті. Оған іргелес жатқан елді мекендерден 8 команда қатысты. Ұлы Жеңістің 80 жылдығына арналған турнир айналмалы жүйеде ұйымдастырылды. Мұндай форматтағы жарыстар салауатты өмір салтын қалыптастырып, бұқаралық спортты дамытуға көмектеседі. «Бұған қоса тасада қалған таланттардың танылуына мүмкіндік береді», – дейді басы-қасындағылар.