Сәкен Майғазиевтің жалғыз ұлы Әділет Майғазы үйленді.

Бұл туралы Caravan.kz медиа порталы хабарлайды.

Бірнеше күннен бері ел аузында жүрген дүбірлі тойға қарапайым халық та онлайн қатыса алады. Тойға онлайн тіркеудің ашылғанын әншінің өзі әлеуметтік желідегі парақшасында мәлімдеді.

«Әділет пен Әдияның тойына онлайн қонақ болу үшін тіркеу басталды», — деп жазды ол.

Біз әншінің Instagram stories-те қалдырған сілтемесі арқылы тіркелуге тырыстық. Сілтеме бізді телеграмм ботқа жіберді. Онда тіркелуші өзінің аты-жөні, телефон нөмірі секілді жеке деректерін тіркейді. Белгілі болғандай, ел арасында «жыл тойы» атанып жатқан дүбірлі қуанышты онлайн тамашалаудың құны 1380 теңге.

Жас жұбайлардан сұхбат алған журналист, тележүргізуші Анна Данченко тойдың онлайн көрсетілімінің ақылы болуының себебін түсіндірді.

«Сілтеме ақылы болады деп айтқан болатынмын. Дұрыс түсініңіздер. Оны мен жасап жатқан жоқпын. Ұйымдастырушылар жасап жатыр. Тікелей эфирде той көрсету үшін арнайы рұқсат алу керек. Оның ақшасы бар. Одан кейін серверге тапсырыс беру керек. Сомасы қатты үлкен емес. 1000 теңгеден сәл асады. Қымбат емес. Ол ақшаны Сәкен аға өзіне немесе отбасына жаратпайды. Ол — тойды түсіретін ұжымға төленетін және серверге беретін ақша», — дейді ол.