Эстрада жұлдызы Қарақат Әбілдина қазақ қыздарының өзге ұлт өкіліне тұрмысқа шығуы жиілеп кеткеніне алаңдайтынын айтты, деп хабарлайды Skifnews.kz ақпарат порталы.

Қыз ұзататын әншілердің тізімінде көш бастайтын өнер иесінің болжауынша, қазақ қыздары қазақ жігіттерінен қорған таппағаннан өзге ұлтқа тұрмысқа шығатынын көрінеді.

«Біраз қазақ қызын ұзатып жүрміз ғой…

Соңғы уақытта өзге ұлтқа тұрмысқа шығып жатқан қазақ қыздарын жиі байқап жүрмін. Бастапқыда бұл менің жүрегіме жеңіл тиген жоқ. Ұлтым, тілім, салт-дәстүрім мен үшін өте қымбат. Қыз — ұлттың айнасы. Оны кімге ұзатсақ та, ұлттың намысы мен рухын бірге ұзатамыз.

Бірақ уақыт өте келе ойлана бастадым. Махаббат ұлт таңдамайды. Әр адамның өз бақыты бар. Әр қыз өз жүрегінің қалауымен, өз тағдыр жолымен жүреді. Дегенмен, менің ойымда бір сұрақ тұрып қалды: Бұл махаббат па? Әлде бақытын өз жерінен, өз елінен таппағаны ма?

Кейде қыздарымыздың қазақ жігіттеріне ренжуі, қорған таппауы оларды өзге жаққа бұрып жібереді ме деген ой келеді. Бұл біреуді кінәлау немесе тағдырын талқылау емес. Жай ғана мені ойландырған мәселе.

Сіз не дейсіз? Қазақ қызының өзге ұлтқа тұрмысқа шығуына көзқарасыңыз қандай? Тек бір-бірімізді сөкпей, тыңдап көрейікші», — деп жазды ол әлеуметтік желідегі парақшасында.

Әншінің оқырмандары бұл тақырыпта қыздарды кінәләу орынсыз екенін айтуда.

«Қыздарды кінәлап болсақ, жігіттерге бір назар аударыңыздаршы. Ойынқұмар, араққа салынған жігіттер көп. Қазір қыздар қаржылық, мансап, психология жағынан қазақ жігіттерінен қайда мықты болып кеткен. Шетелге шықпағанда не істейді», «Дұрыс, ұлтқа қарамай өздерін бағалайтын адамға шығу керек», «Осы мәселені шешкіміз келсе, мемлекеттік деңгейде жігіттерді дамытуды қолға алу керек», — деп жазды олар.

Бірер күн бұрын аталмыш тақырыпқа қатысты тағы бір қыз ұзататын әнші, «Жігіттер» квартетінің мүшесі Айдар Тұрғамбек те әлеуметтік желіде пікір білдірген еді.

Ол қазақ қыздарының шетелдікке тұрмысқа шығуы исламда күнә болып саналатынын айтты.

«Қазақ қыздарының шетелдіктерге тұрмысқа шығуы көбейіп барады. Зияндары: 1. Исламда күнә болады. 2. Тегіңді құртасың. 3. Ата-анаң қиналады. 4. Ұрпағың дүбәрә болады. 5. Толық сіңісіп кете алмайсың. 6 Жастық шақта білінбеуі мүмкін, бірақ өміріңнің соңы өкініш болады.

Тик-ток та бір қазақ қызының европалық діні бөлек жігітке тұрмыс құрып бірге тұрып жатқанын күніге көрсетіп отырады,жарнама жасап жатқандай.Енді ойлашы оны көріп отырған қаракөз қыздар бізде солай шетелдікке тиіп кетсек,солай қыдырып жүрсек деп армандайды ғой. Бірақ расында шетелдікке тиген қыздардың іші қалай болып жатқаны белгісіз ғой.Мен өзім сондай қыздың өкінгенін көзінен көргенмін,қасында Анасы жылағандай болып маған сырын айтқан еді», — дейді ол.