Тергеу материалдарына сәйкес, алғашқы оқиға 2024 жылдың 16 мамырында Сарыағаш ауданына қарасты Сіргелі ауылында болған.

Түркістан облысының Қылмыстық істер жөніндегі мамандандырылған ауданаралық соты ауыр қылмыс жасады деп айыпталған жасөспірімге қатысты үкім шығарды, деп жазады inbusiness.kz сайты.

Жасөспірім көрші тұратын 2021 жылы туған баланы әжетхана шұңқырына итеріп, қасақана өлтірген.

Екінші жағдай сол жылы, 13 шілдеде тіркелген. Бұл жолы ол 2019 жылы туған тағы бір көрші баланы дәл сол тәсілмен өмірінен айыруға әрекеттенген. Алайда бұл әрекеті жүзеге аспай қалған.

Сот отырысында ұсынылған кешенді сот-психиатриялық және психологиялық сараптамалар қорытындысына сәйкес, айыпталушыға "шизофрения белгілері бар жіті полиморфты психоздық бұзылу" диагнозы қойылды. Мамандардың айтуынша, ол қылмыс жасалған сәтте өзінің әрекетіне есеп бере алмаған және олардың мәнін түсінбеген. 2025 жылы тағайындалған қайталама сараптама да осы диагнозды растады.

Сот Қазақстан Республикасы Қылмыстық кодексінің 16-бабына сүйене отырып, жасөспірімді қылмыстық жауапкершіліктен босатты. 2025 жылдың 5 наурызында шығарылған қаулыға сәйкес, ол интенсивті бақылаудағы мамандандырылған психиатриялық стационарда мәжбүрлі түрде емделетін болды.

Сонымен қатар, жәбірленуші тараптың азаматтық талаптары ішінара қанағаттандырылып, жасөспірімнің заңды өкілінен 20 миллион теңге көлемінде өтемақы өндірілетін болды.

Сот қаулысы заңды күшіне енді, деп хабарлады Түркістан облыстық сотының баспасөз қызметі.