Маңғыстау облысына Еуропалық Одақ Кеңесінің Шығыс Еуропа және Орталық Азиямен байланыс жөніндегі жұмыс тобының басшысы Киара Обрайен бастаған делегация келді, деп хабарлайды El.kz интернет порталы.

Кездесу барысында тараптар Еуропалық Одақ пен Қазақстан арасындағы екіжақты қарым-қатынастар, «Жаһандық шлюз» бастамасы, Транскаспий көлік дәлізін дамыту, порттардың тиімді жұмыс істеуі, сондай-ақ Каспий маңы елдерінің өзара ықпалдастығы мен Еуропалық Одақ пен Орталық Азия арасындағы ынтымақтастықтың әлеуетті бағыттарын кеңінен талқылады.

Өз сөзінде облыс әкімі Нұрдәулет Қилыбай Маңғыстау өңірі үшін Еуропалық Одақпен әріптестікті кеңейту аса маңызды екенін атап өтіп, қос тараптың өзара тиімді байланысын нығайтуға бағытталған бастамаларды қолдауға әрдайым дайын екенін жеткізді.

Маңғыстау еліміздің мұнай-газ өндіру, мұнай сервисі, өңдеу өнеркәсібі, көлік және логистика, агроөнеркәсіптік кешен, туризм және жаңартылатын энергия көздері салаларындағы жетекші өңірлерінің бірі. Транскаспий көлік бағытын дамыту және теңіз порттарының инфрақұрылымын кеңейту бағытындағы жұмыстар қарқын алып, Ақтау мен Құрық порттары арнайы экономикалық аймақ құрамына енгізілді. Бүгінде Маңғыстау — Еуропа мен Азияны жалғайтын, халықаралық маңызы зор транзиттік және көліктік-логистикалық әлеуетке ие стратегиялық өңір. Озық технологияларға, сапа мен тиімділікке негізделген экономикасы бар Еуропа мемлекеттерімен көпжақты байланыс орнату — облыс үшін ерекше басымдықтардың бірі. Бүгінгі кездесуіміз бірлескен жобаларды табысты жүзеге асыруға бағытталған нақты қадамдардың бастауы болады деп сенеміз, – деді Нұрдәулет Қилыбай.

Айта кетейік, Еуропалық Одақ — халықаралық аренада дипломатия, сауда, даму бойынша көмек көрсету және өзге де жаһандық мәселелерді шешуде маңызды рөл атқаратын ұйым. Қазіргі таңда ЕО құрамында 27 мемлекет бар, оның ішінде Маңғыстау облысы 25 мемлекетпен тұрақты сыртқы сауда байланысын жүзеге асырып келеді.

2025 жылдың алғашқы үш айының қорытындысы бойынша Маңғыстау облысы мен Еуропалық Одақ елдері арасындағы сыртқы сауда айналымы 395,4 млн АҚШ долларын құрады. Оның ішінде экспорт көлемі 376,9 млн АҚШ долларына жетсе, импорт 18,5 млн АҚШ долларын құрады.