Мұны Украина Президенті Владимир Зеленский растады.

Ресей Қорғаныс министрлігі Ыстанбұлда қол жеткізілген келісімдер аясында 25 жасқа дейінгі алғашқы топтағы ресейлік әскери қызметшілердің елге қайтарылғанын хабарлады, деп жазады inbusiness.kz BBC-ге сілтеме жасап.

Оның айтуынша, бұл процесс бірнеше кезеңмен өтіп, алдағы күндері жалғасады.

"25 жасқа дейінгі ресейлік әскери қызметшілердің алғашқы тобы қайтарылды. Олардың орнына дәл сондай санаттағы Украина Қарулы күштерінің тұтқындары берілді", – делінген Ресей Қорғаныс министрлігінің мәлімдемесінде.

Ресейлік сарбаздар Беларусь жерінде орналасқан. Қанша адам алмасқаны нақтыланбаған.

"Бүгін тұтқын алмасу басталды. Ол алдағы бірнеше күнде бірнеше кезеңмен жалғасады. Қазір қайтарылып жатқан топтар арасында жараланғандар мен ауыр жараланғандар, сондай-ақ 25 жасқа дейінгілер бар. Бұл – өте күрделі процесс, көптеген сезімтал жайттар бар, келіссөздер күн сайын жүріп жатыр. Барша тұтқындарды қайтару үшін қолдан келгеннің бәрін жасап жатырмыз", – деді Владимир Зеленский.

Ол да алғашқы күні қанша адам алмасқаны туралы нақты мәлімет берген жоқ.

Айта кетейік, Украина тарапы Ыстанбұлдағы келіссөздер барысында Ресейге депортацияланған балалардың тізімін де беріп, сұрау салған болатын.