Турнирдің алғашқы матчныда "Ертіс" командасы қарағандылық "Шахтерді" жеңді.

Павлодарда футболдан жасөспірім қыздар арасында QJ лига турнирі ресми түрде ашылып, алғашқы матч болды. Лиганың бірінші ойынында алаң иесі, павлодарлық "Ертіс" пен қарағандылық "Шахтер" клубтары кездесті. Ойында алаң иелері айқын басымдықпен жеңіске жетті.

Алғашқы матчта "Шахтер" қақпасына қос гол соққан Аружан Оспанова – болашағынан көп үміт күттіретін жасөспірім спортшылардың бірі.

"Футбол менің өміріме айналып кетті десем, артық емес. Бұған дейін ел чемпионатына қатыстық. Енді қыздар арасындағы QJ лига басталды. Бұл біз үшін өте қуанышты жаңалық. Алғашында сенгеніміз жоқ. Ал турдың басты әрі тұсаукесер матчы біздің алаңда өтетінін естігенде, тіпті, қобалжып кеттік", – деді Аружан матчтан кейін берген сұхбатында.

Оның тура тоғыздыққа салған голын жанкүйерлер ерекше қошеметпен қабыл алды.

"Негізі, ойын басталғанда қатты қобалжыдық. Доп аяққа бағынбай, пастарымыз да қиыс кетіп жатты. Бірақ уақыт өте келе алаңға бой үйретіп, басымдықты қолға алдық. "Шахтер" қыздарын біз бұрын да ұтып жүрген едік. Яғни, бұл матчта біз фаворит болдық. Енді осы турнирдің чемпионы атанып, Дастан Сәтпаев сияқты танымал болғымыз келеді. Ал жалпы әлемдік футболда Киллиан Мбаппені кумир санаймын", – деді жасөспірім футболшы.

Оқи отырыңыз:

• Спорт министрі Ербол Мырзабосынов QJ League жобасымен танысты
• QJ лига: жаңа командалар, қыздар бәсекесі және мадридтік "Атлетико"