2025 жылғы 10 маусымда Үкімет отырысында Туризм және спорт министрі Ербол Мырзабосынов шетелдік туристер үшін жағдайды жақсарту жөніндегі бірқатар ұсынысты жариялады, деп хабарлайды Zakon.kz тілшісі.

Министрдің айтуынша, туристің ел туралы алғашқы әсері әуежай мен шекара бекетінен басталады.

"Ондағы қызмет көрсету сапасы – ел жайлы пікір қалыптастырудың алғашқы қадамы. Кейбір туристер үшін виза рәсімдеу процесі бірнеше сағатқа созылып кетеді. Мұндай жағдайлардың алдын алу үшін шекара қызметі мен әуежай қызметкерлеріне оқыту бағдарламаларын ұйымдастыруды ұсынамыз. Бұл үшін Халықаралық туризм университеті мен Kazakh Tourism ұлттық компаниясының әлеуетін пайдалануға дайынбыз. Туристерге ыңғайлы болу үшін өткізу бекеттерінде Q-gate жүйесін енгізуді ұсынамыз", – деді Ербол Мырзабосынов.

Министр Алматыда жақсы бастама іске қосылғанын атап өтті – туристерге қазақстандық шоколад таратылуда.

"Мұндай іс-шаралар елдің қонақжайлығын білдіреді. Грузияда бұл – шарап, бізде – шоколад. Тағы бір ұсыныс – туристерге келу кезінде тегін SIM-карта беру. Бұл оларға интернет пен байланысқа бірден қол жеткізуге көмектеседі. Кең таралған мәселе – заңсыз такси қызметтері. Халықаралық әуежайларда QR-код жүйесі енгізілген. Ол заңды такси, қонақүйлер, электронды SIM-карталар мен туристік нысандар туралы ақпаратты қамтиды", – деді министр.

Ербол Мырзабосыновтың пікірінше, әкімдіктер үнемі бақылау жүргізіп, түсіндіру жұмыстарын ұйымдастыруы қажет.

"Қажет болған жағдайда ереже бұзушыларға қатысты жауапкершілікті күшейту мүмкіндігін де қарастыру керек. Сонымен қатар, түнгі уақытта әуежай мен қала орталығы арасында автобус қатынасы жоқ, бұл – ірі халықаралық қалаларда шешілген мәселе. Осы мәселені шешу үшін түнгі экспресс-маршруттарды іске қосуды ұсынамыз. Автотуристерге қызмет көрсету мәдениетінің де маңызы зор. Полиция тарапынан көрсетілген көмек ел туралы жағымды пікір қалдырады", – деп толықтырды министр.

Бұған дейін соңғы үш жылда Қазақстан армиясында қандай өзгерістер болғанын жазған болатынбыз.