Шымкенттегі психикалық денсаулық орталығында емделген екі қызды зорлаған емдеу мекемесінің қызметкерлеріне сот үкімі шықты. Сотталушы қос азамат әйелдер бөлімшесінде санитар бақылаушы болып қызмет атқарған. Олар былтыр шілде айында орталықта емделіп жатқан келіншек пен кәмелетке толмаған бойжеткенді науқастар теледидар көретін бөлмеге және аулаға шығатын баспалдақ маңына күштеп апарып, бірнеше рет жыныстық қатынас жасаған. Зорлықтан кейін бойжеткеннің бойына бала бітіп, кейіннен денсаулығына байланысты түсік жасатуға тура келеді. Сот барысында санитар бақылаушы қызметін атқарған екі азаматтың іс-әрекеті жәбірленушілердің және олардың заңды өкілінің жауаптарымен дәлелденді. Судья заңға сүйене отырып, олардың әрқайсысын 15 жыл бас бостандығынан айырды. Сотталушылар үкімге сәйкес сондай-ақ жәбірленушілердің әрқайсысына 5 миллион теңге моральдық шығын төлеуге міндеттелді. Сот мұнан бөлек полиция мен денсаулық сақтау басқармасы тарапынан жіберілген кемшіліктерге байланысты да қаулы қабылдады.

Самидин Темірәлиев, Шымкент қаласы қылмыстық істер жөніндегі мамандандырылған ауданаралық сотының судьясы:

Қылмыстық қудалау органдарында жіберілген елеулі заңбұзушылықтар анықталды. Және облыстық психикалық денсаулық орталығы қызметкерлеріне қатысты Түркістан облысы денсаулық сақтау басқармасына жеке қаулы шығарылды. Жеке қаулы бір ай мерзімде қаралып, онда көрсетілген заңбұзушылықтар мен кемшіліктер бойынша көрілген шаралар сотқа жолднауы тиіс.

Ғани Қалмаханов