Астанада Рамазан айының алғашқы хатым дұғасы жасалды .

Астанадағы "Әлжан ана" мешітінде Қазақстан мұсылмандары діни басқармасының төрағасы Наурызбай қажы Тағанұлының қатысуымен өткен тарауық намазында жеті күнде Құран Кәрімді толық хатым жасаған қос қариға ұмра қажылығына жолдама берілді, деп хабарлады ҚМДБ баспасөз қызметі.

Бас мүфти мешіт жамағатына тарауық өткізіп жүрген қарилар Мәлік Айдарұлы мен Нұрболат Әуесханға алғыс білдіріп, демеушілердің көмегімен ұмра жолдамасын табыстады.

Сондай-ақ, Қазақстан мұсылмандары діни басқармасының төрағасы Наурызбай қажы Тағанұлы елордадағы "Әлжан ана" мешітінде өткен тарауық намазына қатысып, жамағатпен бірге Құран хатым дұғасын жасады.

Бас мүфти мешіт жамағатын қасиетті Рамазан айымен құттықтап, оразаның хикметі жөнінде насихат айтты. Бұдан кейін қос қари Мәлік Айдарұлы мен Нұрболат Әуесхан Құран Кәрімнің соңғы параларын оқып, ҚМДБ төрағасы Наурызбай қажы Тағанұлы хатым дұғасын жасады.

"Осы оқылған қасиетті Құран Кәрімнің хатым дұғасын дүниеден өткен барша мұсылмандардың, ел егемендігі жолында шейіт болған бабаларымыздың, арыстарымыздың, боздақтарымыздың рухына бағыштадық. Олардың алдын пейіш, соңын кеніш ете гөр", – деді бас мүфти.

ҚМДБ Төрағасы Рамазан айы кірген сәттен бастап жеті күн үшінде отыз параны толық оқыған қарилар Мәлік Айдарұлы мен Нұрболат Әуесханға және тарауық намазына үзбей қатысып жүрген мешіт жамағатына ризашылығын білдірді.

Оқи отырыңыз: Ораза-2025: Сәресі мен ауызашарда оқитын дұғалар