Елдімекенде ауыз су жүйесі мен ұңғымалар әбден ескірген.

Алматы облысындағы мыңдаған тұрғыны бар Көктоған ауылында ауыз су тапшылығы өзекті мәселеге айналды. Аптап ыстықта елдімекен жұрты тіршілік нәрін табу үшін күн сайын әуреге түсіп отыр. Ауыл тұрғындары бұл мәселе бойынша жергілікті әкімдікті кінәлайды. Олардың айтуынша, аталған түйткілді шенеуніктер естісе де, үш жылдан бері нақты әрекетке көшпеген, деп хабарлайды 31-арнаның "Информбюро" ақпараттық бағдарламасы.

Елдімекенде ауыз су жүйесі мен ұңғымалар әбден ескірген. Тозығы жеткен желінің салдарынан тұрғындар сүзгіден өтпеген, санитарлық талапқа сай келмейтін суды тұтынуға мәжбүр.

"Қыстың өзінде 400 мың теңге шығынға баттық. Суды жердің астынан өзіміз қазып алып отырмыз. Алайда жер асты суы – қышқылды, құм аралас. Осы себепті су моторы қайта-қайта жанып кетеді. Ал бұл мәселені әкімдікке айтсақ, бізге күліп қарайды", – дейді Көктоған ауылының тұрғыны Ұлжан Мұрат.

"Әкімдік жол салмаймыз, алдымен су тарту керек дейді. Ал ауылда әлі күнге дейін су жоқ. Балаларға жарық орнату үшін мектептен көмек сұрасақ, жол жоқ дейді. Енді жол сал деп айтсақ, судың мәселесі шешілмеген дейді. Бұл – халықты мазақ қылғанмен бірдей", – деп шағымданады ауыл тұрғыны Алмагүл Дүрменова.

Оқи отырыңыз: "Монша бағасы күрт өсті". Петропавлда бірнеше аудан тұрғындары ыстық сусыз қалды

Көктоған халқы күн сайын бос ыдыстарын тиеп, арба сүйреп су іздеуге мәжбүр. Әсіресе жаз мезгілінде жағдай қиындай түседі – тұрғындардың айтуынша, аптап ыстықта ауылда су мүлдем тоқтап қалады.

Су, жарық және жол мәселесінің қиын жағдайда екенін жергілікті әкімдік те жоққа шығармайды. Алайда тұрғындар үш жылдан бері көтеріп келе жатқан мәселеге байланысты нақты жоба енді ғана қолға алынған.

"Су мұнарасын және резервуар орнату үшін бізге шамамен 1 гектар жер қажет болды. Қазіргі таңда бұл жер табылып, иесімен келісім жасалып, сатып алынды. Енді жобалау жұмыстары жалғасын табатын болады", – деді Қарасай ауданының тұрғын үй-коммуналдық шаруашылық және тұрғын үй инспекциясы бөлімінің басшысы Салават Қазиев.

Оқи отырыңыз: Атырауда бөгет салған жұмысшылар бір жылдан бері еңбекақыcын ала алмай жүр

Алайда көктоғандықтардың қашан таза ауыз суға қол жеткізетіні әзірге белгісіз. Үміті үзілген ауыл тұрғындары жергілікті әкімді ауыстыруды талап етіп отыр.