Қазір бүлдіршіннің жағдайы ауыр.

Қызылорда қаласындағы жекеменшік балабақшада тәрбиешілердің салғырттығы салдарынан екі жасар Еркежан Шардарбектің денесінің 40 пайызы ыстық сумен күйіп қалған. Қазіргі уақытта бүлдіршін ауыр халде ауруханада жатыр, деп хабарлайды 31-арнаның "Информбюро" ақпараттық бағдарламасы.

Мамыр айынан бері балалар ауруханасында ем қабылдап жатқан Еркежанның аяқтары, жамбасы мен іш терісі қатты зақымданған. Денесінің бірнеше бөлігінде күйік жарақаты бар балақай түн ұйқысын бөліп, қатты қиналып жүрген көрінеді.

Бүлдіршіннің анасы Айнұр Айдарбекованың айтуынша, балабақша қызметкерлері баланы жуындырып жатқан кезде ыстық суды абайсызда қосып жіберген. Алайда анасы оқиға жайлы айтылған нұсқаға сенбейді.

"Олар маған ‘қызыңыз ұйқыдан тұрып, үлкен дәретке отырды. Үстін бүлдіріп алған соң, жуындырдық’ деді. ‘Сол кезде Еркежан өзі суға араластырғышты бұрап, ыстық суды қосып жіберді’ дейді. Бірақ біз бұған сенбейміз. Өйткені мұндай 30–40 пайыздық күйік жай ғана аристон суынан бола қоймайды", – деді Қызылорда қаласының тұрғыны Айнұр Айдарбекова.

Айнұр Айдарбекова бүлдіршіннің қауіпсіздігіне бей-жай қараған балабақша әкімшілігінен бастап, тәрбиешілерге дейін заң алдында жауап беруді талап етуде.

Оқи отырыңыз: Қызылордада мыңдаған бүлдіршін балабақшасыз қалуы мүмкін

Балабақша басшылығы оқиғаға қатысты түсініктеме берді. Олар Еркежанның күйік жарақатын дәл сол қол жуғыштағы ыстық судан алғанын растады. Мекеме басшылары тәрбиешілер тарапынан өрескел қателік кеткенін мойындап, кінәлі қызметкерлерді жұмыстан шығарғанын айтты.

"Шомылдыру кезінде техникалық қауіпсіздік талаптары сақталмаған. Осы салғырттықтың салдарынан бала аристоннан шыққан ыстық суға күйіп қалды. Қазіргі таңда бұл оқиға бойынша қылмыстық іс қозғалып, тергеу жүргізілуде. Біз тарапымыздан екі тәрбиешінің көмекшісі еңбек заңнамасына сәйкес жұмыстан босатылды", – деді "Сыр болашағы" балабақшасының меңгерушісі Ағжан Абдуллаева.

Оқи отырыңыз: "Құдайға жалбарынып отырып қалдым". Жамбыл облысы тұрғындары жер сілкінісін қалай өткерді? Фоторепортаж

Қазір полицейлер ҚР Қылмыстық кодексінің "кәмелетке толмаған баланы тәрбиелеу жөніндегі міндеттерді орындамау" бабымен тергеу амалдарын жүргізіп жатыр. Ал Еркежанның анасы оқиға кезінде балабақша қызметкерлері жедел жәрдем де шақырмағанын айтып, болған оқиғаның жан-жақты тексерілуін талап етуде.