Ол есірткі заттарын жасырып кету арқылы таратуды жоспарлаған.

Павлодарда мопед жүргізушісінен есірткі тәркіленді, деп хабарлайды Polisia.kz.

Павлодар қаласындағы Мүткенов көшесінде "Қарасора" іс-шарасын жүргізу барысында полиция қызметкерлері 32 жастағы ер адамды ұстады.

"Жеке тексеру кезінде оның үстінен екі полиэтилен орамға оралған тыйым салынған заттар табылды. Күдіктінің тұрғылықты мекенжайын тінту кезінде қосымша алты орама мен бір пакет, сонымен қатар "зип" пакеттер, электронды таразы және орауға арналған құрылғы тәркіленді", – делінген хабарламада.

Оқи отырыңыз: Қазақстанда ірі алаяқтық жасады деген шетел азаматы Черногорияда ұсталды

Сараптама қорытындысына сәйкес, алынған заттардың салмағы 8 грамнан асатын синтетикалық есірткі болып шықты. Ұсталған азамат интернет-дүкенде есірткі тасымалдаушы ретінде жұмыс істегенін мойындады.

"Ол есірткі заттарын жасырып кету арқылы таратуды жоспарлаған. Қазіргі уақытта ҚР ҚК бойынша есірткі құралдарын немесе психотроптық заттарды заңсыз дайындау, қайта өңдеу, сатып алу, сақтау, тасымалдау, жөнелту немесе өткізу фактісі бойынша қылмыстық іс қозғалды", – делінген хабарламада.

Күдікті қамауға алынды, қылмысқа қатысы бар басқа тұлғалар анықталуда.