Алматыда 50 жылдан астам уақыт пайдаланылған құбыр желісін ауыстыру мақсатында Радостовец көшесінің бойымен қозғалыс бір жарым айға шектеледі, деп хабарлайды Zakon.kz.

"Алматы жылу жүйесі" ЖШС-нің хабарлауынша, алдағы жылыту маусымына дайындық аясында Алматы қаласының Бостандық ауданында 1973 жылы пайдалануға енгізілген 1,5 километрге жуық құбыр желісі ауыстырылады.

Осыған байланысты 2025 жылғы 14 маусым мен 4 тамыз аралығында Радостовец көшесінің Солодовников көшесінен Жандосов көшесіне дейінгі аралығында көлік қозғалысы уақытша шектеледі. Қозғалыс екі бағыт бойынша да тоқтатылады.

Уақытша шектеу жұмыстардың қауіпсіздігін қамтамасыз ету мақсатында енгізіліп отыр. Жөндеу кезінде көшенің жүріс бөлігінің астымен өтетін магистральдық құбыр желісі қайта жаңартылады.

"Жөндеу жұмыстары жүргізілген кезеңде жылу желісіне қосылған тұтынушылар үшін ыстық су беру тоқтатылмайды. Аталған жылу магистралі 16 көпқабатты тұрғын үй мен 7 әлеуметтік және коммерциялық нысанды жылу энергиясымен және ыстық сумен қамтамасыз етіп отыр", — делінген хабарламада.

Айта кетейік, ағымдағы жылы қала бойынша 39 км жылу желілерін жаңғырту жоспарланған. Бұл тозу деңгейін 54% дейін төмендетуге мүмкіндік береді.