Азаматтық авиация комитеті Таяу Шығыстағы жағдайға қатысты мәлімдеме жасады. Мәлімдеге сай, еліміздің әуекомпанияларына бірнеше елдің әуе кеңестігінде ұшуға тыйым салынды, деп хабарлайды KAZ.NUR.KZ.

"Таяу Шығыстағы жағдайға және азаматтық авиация қауіпсіздігіне төнген қауіптің жоғары болуына байланысты Қазақстанның авиациялық әкімшілігі келесі ескертуге дейін Иран, Израиль, Сирия, Ирак, Иордания және Ливанның әуе кеңістігінің үстінде, ішінде және оған жақын жерде ұшуға толық тыйым салады.

Бұл нұсқаулық қазақстандық әуе кемелерін пайдаланушылардың барлық тұрақты және тұрақты емес жолаушылар, жүк және техникалық рейсіне қолданылады.

Нұсқау алынған сәттен бастап күшіне енеді және міндетті түрде орындалуға тиіс. Тиісті аймақтағы жағдай өзгерсе, Қазақстанның авиациялық әкімшілігінің авиациялық қауіпсіздік департменті қосымша ақпарат жібереді", — делінген хабарламада.

Естеріңізге сала кетейік, бүгін түнде Израиль әскері Иранға соққы жасады.

Иранның ядролық бағдарламасының ең маңызды нысаны орналасқан Натанз қаласына жасалған шабуылдан кейін елде бірнеше жарылыс дыбысы естілді.

Бүған қатысты Атом энергиясы жөніндегі халықаралық агенттік басшысы түсінік беріп, Иранның ядролық нысанына соққы жасалғанын растады.

Ал Израильде төтенше жағдай жарияланды. Елдің қорғаныс министрі Кац жақын арада жауап ретінде Израиль мен оның бейбіт тұрғындарына соққы жасалуы мүмкін екенін ескертті.

Кейін ЦАХАЛ бригада генералы Эффи Дефрин Иран соңғы бірнеше сағат ішінде Израильге 100-ден астам ұшқышсыз ұшатын аппарат ұшырғанын айтты. Израиль қорғаныс күштері қазір оларды атып түсіру бойынша жұмыс істеп жатыр.

Қазақстанның Израильдегі елшілігі Таяу Шығыстағы жағдайдың ұшығуына байланысты сол елде жүрген отандастарымызға үндеу жасады.

Таяу Шығыстағы қақтығысқа қатысты еліміздің сыртқы істер министрлігі ресми мәлімдеме жасады.

"Қазақстан Республикасының Сыртқы істер министрлігі Таяу Шығыс өңіріндегі қауіпті әскери шиеленіске байланысты өз алаңдаушылығын білдіреді және қақтығысты БҰҰ Жарғысы мен халықаралық құқық нормаларына сәйкес тек саяси-дипломатиялық жолмен тез арада реттеуді құптайды.

Қатысушы тараптарды барынша ұстамды болуға шақырамыз", - делінген Қазақстан Республикасы сыртқы істер министрлігінің мәлімдемесінде.