Еліміздің Атом энергиясы жөніндегі агенттігі халықаралық сарапшылардың қатысуымен Қазақстандағы алғашқы атом электр станциясын салу үшін консорциум көшбасшысын айқындау жұмысын аяқтады, деп хабарлайды inbusiness.kz сайты.

Агенттік баспасөз қызметінің мәліметінше, ашық және бәсекелі диалог әдісімен реакторлық технологиялардың жетекші әлемдік жеткізушілерінің басшыларымен келіссөздер өтіп, компаниялардың өндірістік нысандарын мамандар аралап шыққан.

"Жүргізілген жұмыстың нәтижелері бойынша ықтимал вендорлардың "шорт-листі" құрамына "Росатом" (Ресей), "China National Nuclear Corporation" (Қытай), "Électricité de France" (Франция) және "Korea Hydro & Nuclear Power" (Оңтүстік Корея) енді", – деп хабарлады Атом энергиясы жөніндегі агенттік.

Хабарламада айтылғандай, шорт-листке енген компаниялар Қазақстанда АЭС салу бойынша техникалық және коммерциялық ұсыныстардан тұратын кешенді материалдар топтамасын ұсынды. Олардың ішінде мынадай мәліметтер болды:

– құрылыс құнының болжамды сметасы;

– жобаны іске асыру мерзімдері;

– қаржыландыру тарту моделі;

– жабдық пен құрылыс жұмыстарын жергіліктендіру тәсілдері;

– кадрлар даярлау және ғылыми-білім беру әлеуетін дамыту бойынша ұсыныстар;

– ядролық отын циклі саласындағы ынтымақтастық мүмкіндіктері;

– әлеуметтік міндеттемелер мәселелері.

"Нәтижесінде, ҚР Атом энергиясы агенттігі "Қазақстандық атом электр станциялары" ЖШС және француздың Assystem инжинирингтік компаниясының қатысуымен әзірлеген әдістеме негізінде ұсынылған реакторлық технологиялар мен вендорлардың өзге де ұсыныстарына кешенді бағалау жүргізілді. Бағалау АЭС қауіпсіздігі, технологиялық және қаржылық аспектілер, халықаралық тәжірибе, персонал даярлау, жергіліктендіру деңгейі және басқа да бөлімдер бойынша жүргізілді. Осы талдаудың қорытындылары атом саласын дамыту мәселелері жөніндегі Ведомствоаралық комиссияның қарауына ұсынылып, Қазақстанда АЭС салу бойынша ең оңтайлы әрі тиімді ұсыныс ретінде ресейлік "Росатом" компаниясының ұсынысы таңдалды. Одан кейінгі орынға қытайлық "China National Nuclear Corporation" ұсынысы орналасты. Франциялық "Électricité de France" пен кореялық "Korea Hydro & Nuclear Power" ұсыныстары үшінші орынды бөлісті. Осылайша, "Росатом" компаниясы Қазақстандағы алғашқы АЭС салу жобасы бойынша халықаралық консорциумның көшбасшысы ретінде айқындалды", – деп қосты агенттік баспасөз қызметі.

Қазір "Росатом" ұсыныстарына сәйкес Ресей Федерациясы есебінен мемлекеттік экспорттық қаржыландыру тарту мәселесі қарастырылып жатыр.

"Агенттік Қазақстанда алғашқы АЭС салу үшін тиімді халықаралық консорциум қалыптастыру бойынша шетелдік серіктестермен жұмысты жалғастырады", – деп түйіндеді ведомствоның баспасөз қызметі.