Франция президенті Эммануэль Макрон 15 жасқа дейінгі балаларға әлеуметтік желілерді пайдалануға тыйым салу бастамасын жариялады. Еуропалық басылымдардың пайымынша, бұл ұсыныс Францияда қоғамдық қолдауға ие болып , Макрон үшін саяси ұпай жинаудың тиімді құралына айналуы мүмкін.

Бұл туралы Caravan.kz медиа порталы kaz.inform.k-ке сілтеме жасап хабарлайды.

Politico басылымы бұл ұсынысты Макрон үшін «саяси құрал» деп сипаттап отыр. Себебі бұл бастама Париждің кәмелетке толмағандарды интернеттегі порнографиялық мазмұннан қорғау әрекеттерінен кейін және Франциядағы мектептердің бірінде 14 жастағы оқушының 31 жастағы мектеп қызметкерін пышақтап өлтірген оқиғадан соң күн тәртібіне қайта шықты. Қылмыста қолданылған пышақтың да әлеуметтік желі арқылы табылғаны атап өтілген.

Оқиғадан кейін жергілікті телеарнаға сұхбат берген Макрон әлеуметтік желілерді сынға алды. Ол Францияның Еуроодақтың әрекетін күтуге уақыты жоғын айтып, Брюссель шұғыл қадам жасамаса, елдің жеке-дара әрекет ететінін мәлімдеді.

Алайда кейінірек бұл істі тергеп жатқан прокурор күдіктінің әлеуметтік желілерді өте сирек пайдаланғанын, есесіне қатыгез бейнеойындарға әуестігін айтқан. Соған қарамастан, бастама қоғамдық және саяси алаңда талқылануын жалғастырып жатыр.

Еуропалық шолушылар Макронның бұл тақырыпты қоғамдық талқылауға шығаруы оның пайдасына шешілуі мүмкін екенін айтады. Harris Interactive зерттеу компаниясының былтырғы сауалнамасына сәйкес, француздардың 73%-ы әлеуметтік желілерге жас шектеу енгізуді қолдайды. Зерттеулер де балалардың экран алдында тым көп уақыт өткізбеуі керектігін көрсеткен.

Макронның бұрынғы кеңесшілерінің бірі бұл ұсынысты «барлығын бақылауда ұстап отыр деген әсер қалдыру тәсілі» деп атады. Оның айтуынша, егер бастама сәтсіздікке ұшыраса, президент оны парламентке ысыра салады, ал егер сәтті іске асса, партиялық саясаттан тыс мәселелер бойынша күн тәртібін өзі қалыптастырып отырғанын дәлелдей алады.

Макрон екінші мерзімінің басынан бері әлеуметтік желілер мен экрандар үшін жас шектеуін енгізуге тырысып келеді. 2023 жылы 15 жасқа дейінгі балаларға әлеуметтік желілерді пайдалануға тыйым салатын заң қабылданғанымен, ол нақты жүзеге аспай қалды. Себебі жас мөлшерін тексеру мәселесі техникалық тұрғыда қиындық тудырды әрі заң Еуроодақтың цифрлық қызметтер туралы заңымен қайшылыққа түсті.

2024 жылғы сәуірде Елисей сарайы құрған сарапшылар комитеті әлеуметтік желілер үшін 15 жасты ресми жас шегі ретінде ұсынды. Маусым айында Макрон бұл ұсынысты іске асыруға уәде берген еді. Алайда көп ұзамай ол парламенттегі көпшілік қолдаудан айырылды.

Макрон жақында бұл мәселенің маңыздылығын атап өтіп, тез шешім қабылдау керектігін айтты. Дегенмен Францияда көпшілік оны бірден әрекет етеді деп күтпейді.

Fondation pour l’Enfance балалар құқығын қорғайтын үкіметтік емес ұйымының заңгері Politico басылымына берген сұхбатында: «Макронның командасы көбіне нақты шаралармен емес, тек мәлімдемелермен шектеледі», – деді.

Президент кеңсесі алдағы апталар мен айларда балалардың экран алдында өткізетін уақытын шектеу және әлеуметтік желілерді пайдалану ережелерін күшейту бойынша бірнеше отырыс өткізуді жоспарлап отыр.