Еурокомиссия төрағасы Урсула фон дер Ляйен мен АҚШ президенті Дональд Трамп Еуроодаққа қатысты баж салығын көтеру мәселесі 9 шілдеге шегерілгенін мәлімдеді, деп хабарлайды KAZ.NUR.KZ.

Еурокомиссия төрағасы Урсула фон дер Ляйен өзінің X желісіндегі парақшасында Трамппен телефон арқылы сөйлескені туралы жазба жариялады.

"ЕО мен АҚШ арасында әлемдегі ең маңызды және тығыз сауда қарым-қатынасы орнаған. Еуропа келіссөздерді жылдам әрі батыл түрде жалғастыруға дайын. Жақсы мәмілеге келу үшін бізге 9 шілдеге дейін уақыт қажет", — деп жазды ол.

Кейінірек Трамп фон дер Ляйеннің жазбасының скриншотын жариялап, жаңа тарифтерді енгізу 9 маусымға қалдырылғанын растады. Ол қоңырау фон дер Ляйен тарабынан түскенін жазды.

"Мен 2025 жылдың 9 шілдесіне дейін кейінге қалдыруға келістім — бұны қуана қабыл алдым. Комиссия президенті келіссөздер тез басталады деді", — деді Трамп.

Еске сала кетейік, өткен аптада Трамп Еуропалық Одақтан әкелінетін барлық тауарға 50 пайыздық баж салығын енгізу ниеті туралы хабарлаған еді.

Бұған дейін наурыздың соңында Дональд Трамп Еуропалық Одақ пен Канадаға егер олар "АҚШ-қа экономикалық зиян келтіру үшін" бірігіп әрекет етсе, одан да қатаң тариф енгізетінін айтып қорқытқан.

Ал ақпанның соңында Трамп ЕО-дан келетін тауарларға, соның ішінде автокөліктерге 25 пайыз баж салығын енгізетінін мәлімдеді.

Сондай-ақ өткен аптада Трамп Apple компаниясына қатысты егер олар Америка Құрама Штаттарынан тыс жерлерде iPhone телефондарын шығаруды тоқтатпаса, кем дегенде 25 пайыз тариф салынатынын айтты.