Бүгін Мәжілістегі отырыста ҚР Ғылым және жоғары білім министрі Саясат Нұрбекке еңбек нарығына қажеті жоқ мамандарды даярлауға бөлінген миллиардтаған қаржы туралы сұрақ қойылды. Алайда министрдің жауабы нақты болмағандықтан, Мәжіліс төрағасы Ерлан Қошанов оны сынға алды, деп хабарлайды Skifnews.kz ақпарат порталы.

“Министр мырза, бұл өте маңызды мәселе. Депутат нақты мәселе көтеріп отыр. Мемлекеттің ақшасы далаға кетіп жатыр деген сөз. Сізден бұған анық жауап күтеміз” – деді Қошанов.

Саясат Нұрбек өз кезегінде бұл деректердің 2019–2021 жылдарға тиесілі екенін айтып, 60 мың жұмыс орны бойынша толық мәліметтің жоқ екенін жеткізді. Министрдің айтуынша, ол кезеңде әдістеме өзгеріп, кейбір мәліметтер нақты болмаған.

Алайда Мәжіліс спикері мұндай бұлыңғыр жауапқа қанағаттанбады.