Қызылорда облысында соңғы үш жылда 28 дәрігерлік амбулатория ел игіліне берілді. Барлығы шалғайдағы ауыл-аймақта бой көтерген. Ал жергілікті дәрігерлер алғаш рет өңірде бауыр трансплантациясын жасады. Медицина күніне орай өңірдің денсаулық сақтау саласының үздіктері марапат төрінен көрініп, сый-құрметке бөленді.

Сыр медицинасында қарқынды серпін бар. Әсіресе, емдеу мекемелері заман талабына сай жаңғырып, озық медициналық құрал-жабдықтармен толықты. Бүгінде дертіне шипа іздеген жандар күрделі оталарды енді облыс орталығында жасатуына толық мүмкіндік бар. Соның айқын дәлелі бауыр, бүйрек трансплантациясы. Жалпы денсаулық сақтау саласындағы өзекті мәселелерді шешуге үш жылда 440 млрд теңгеден астам қаржы бөлінген.

Нұрлыбек Нәлібаев, облыс әкімі:

Облыс орталығында 36 млрд 400 млн теңге көлеміндегі 300 орындық емханасы мен онкологиялық бөлімшесі бар аурухананың құрылысы қарқынды жүруде. Соңғы үш жылда 24 медициналық нысан күрделі жөндеуден өтіп халықтың игілігіне жұмыс жасауда.

Жыл сайын жергілікті дәрігерлер шет елде білім-біліктілігін арттыруды үрдіске айналдырған. Аймақ медицинасы бүгінде Түркия, Германия, Ресей секілді мемлекеттердің дәрігерлерімен халықаралық байланыс орнатып отыр. Төл мерекеге арналған салтанатты шарада антына адал абзал жандар ел алдында ұлықталып, денсаулық сақтау саласының мәртебелі марапаттары табысталды.

Болат Тілеулиев, дәрігер-хирург:

Қазір бүкіл мүмкіншіліктеріміз бар. Жаңадан УЗИ аппаратымыз, рентген аппаратымыз бар. Барлық жағдайымызды жасап жатыр. Дәрі-дәрмектермен қамтылу деңгейі өте жақсы.

Елді мекендерде халықтың медицинаға қол жетімділігі артып келеді. Аймақта құны 1 млрд теңгеден асатын заманауи жылжымалы медициналық кешен арқылы ауыл тұрғындары жыл сайын скринингтік тексеруден өтуде. Ал биыл денсаулық сақтау саласы қызметкерлері үшін облыста 100 пәтерлі алғашқы көпқабатты тұрғын үйдің құрылысы басталды.

Әділбек Серікұлы