Сакен Мұсайбеков «Барыс» хоккей клубының бас директоры болып тағайындалды.

Бұл туралы федерацияның баспасөз қызметі мәлімдеді, деп хабарлайды Caravan.kz медиа порталы.

Алайда, желіде бұл тағайындауды сынап жатқандардың қарасы көп. Танымал спорт журналисі Аслан Каженов бұрын істі болған экс-шенеуніктің жаңа лауазымды қызметке тағайындалуын “абсурд” деп атады.

“Бұндай абсурд бізде ғана болады…

Пара алып ұсталған экс-шенеунік «Барыстың» бас директоры болды. Әңгіме Сәкен Мұсайбеков жайында. Ол 2021 жылы қылмыстық кодекстің 190-бабы 3-бөлігінің 1-тармағы бойынша ірі көлемде алаяқтық жасады деп айыпталған болатын. Яғни, букмекерлік қызмет саласындағы мүдделерге қолдау көрсеткен үшін пара алған. Сәкен Мұсайбеков кінәсін мойындап, мемлекетке 62 млн теңге көлемінде айыппұл төлеп құтылған еді.

Енді ол «Барыс» хоккей клубының бас директоры болып тағайындалды. Сонымен қатар, Ұлттық Олимпиада комитетінде қысқы олимпиадалық спорт түрлері жөніндегі вице-президент және Шайбалы хоккей федерациясының бас директоры қызметін де атқарады. Әп-бәрекелді!”, — деп жазды ол.

Сәкен Мұсайбеков 1967 жылы дүниеге келген. Қазақ мемлекеттік басқару академиясын тәмәмдаған. 2021 жылы пара алды деген күдікке ілінгенге дейін бірнеше лауазымды қызметтерді атқарған.

2015 жылғы ақпан мен 2019 жылғы қаңтар аралығында мәдениет және спорт вице-министрі болса, кейін Ұлттық Олимпиада комитетінің бас хатшысы (2019 жылғы 29 қаңтардан бастап; кейін қайта сайланды (2020 жылғы ақпан – 2020 жылғы мамыр). 2020 жылғы мамыр – 2021 жылғы ақпан аралығында мәдениет және спорт вице-министрі болып қайта тағайындалды.

Еске сала кетейік, 2021 жылы abai .kz сайты Сыбайлас жемқорлыққа қарсы қызметі ҚР Мәдениет және спорт вице-министрі Сәкен Мұсайбековты жемқорлық қылмыс жасады деген күдікпен ұстағаны туралы жазған еді.