2025 жылғы 19 маусымда Сенат кулуарында Ішкі істер министрінің орынбасары – ҚАЖК төрағасы Абай Қайырбеков Бақытжан Байжановтың шартты түрде мерзімінен бұрын босату туралы сотқа өтініш түсірмегенін айтты, деп хабарлайды Zakon.kz.

"Қазір сот органдарында да, қылмыстық-атқару жүйесінің бөлімшелерінде де оның шартты түрде мерзімінен бұрын босату туралы өтініші қаралған жоқ. Болған жоқ. Өтініш бермеген", — деді Абай Қайырбеков.

Ол Байжанов орташа қауіпсіздік деңгейіндегі мекемеде жазасын өтеп жатқанын еске салды.

"Ол қылмысты жасыру бабы бойынша сотталған. Барлық сотталғандар сияқты, күн тәртібін сақтайды, қылмыстық-атқару заңнамасының талаптарын орындайды", – деді ҚАЖК басшысы.

Бұған дейін Салтанат Нүкенованың өлімін жасыру бойынша сотталған Қуандық Бишімбаевтың ағасы Бақытжан Байжановтың мерзімінен бұрын бостандыққа шығуы мүмкін екені хабарланған болатын. Амнистияға байланысты оның жаза мерзімі үштен бірге қысқаруы ықтимал. Бұл шамамен сегіз айды құрайды.

2024 жылғы 13 мамырда Ұлттық экономика экс-министрі Қуандық Бишімбаев жұбайы Салтанат Нүкенованы өлтіргені үшін 24 жылға бас бостандығынан айырылды. Ал Байжанов төрт жылға сотталды.