2025 жылғы 19 маусымда Алматы қаласы мен Алматы облысында электрмен жабдықтау уақытша шектелді. Бұл жағдайдың себебі туралы Zakon.kz-ке “Алатау Жарық Компаниясы” АҚ баспасөз қызметі хабарлады.

Белгілі болғандай, 19 маусым күні сағат 16:45-те Алматы энергия торабы аумағында автоматты түрде жүктеме түсіру орын алған – апатқа қарсы автоматика жүйесі іске қосылған:

• САОН – жүктемені автоматты түрде ажырату жүйесі,

• АЧР – жиілік бойынша автоматты түрде тұтынушыларды ажырату (бұл – бүкіл аймақты жарықсыз қалдырмау үшін кейбір тұтынушыларды уақытша ажыратып тастайтын механизм).

Нақты себебі – 500 киловольт (кВ) кернеулі электр жеткізу желілерінің апаттық өшуі. Бұл желілер “KEGOC” АҚ – Қазақстанның ұлттық электр желісі операторының басқаруында.

"Қазір мамандар апат салдарын жою жұмыстарын жүргізіп жатыр", – делінген "Алатау Жарық Компаниясы" хабарламасында.

Жүйелік оператордың (елдегі энергетика саласының бас диспетчері) шешімімен, жүйеге шамадан тыс жүктеме түсіп, жаңа ақаулар туындамауы үшін Алматы облысының келесі аудандарында уақытша электр шектеуі енгізілді:

• Жамбыл,
• Балқаш,
• Есік,
• Райымбек,
• Шелек,
• Кеген,
• Қарасай аудандары.

Сондай-ақ Алматы қаласында да уақытша шектеулер бар.

Шектеу көлемі – 240 мегаватт (МВт).

"Бұл уақытша шектеу аталған аймақтардағы кей тұтынушылардың біраз уақытқа жарықсыз қалуы мүмкін екенін білдіреді", – деді компания.

Хабарламаның соңында энергожүйедегі жиілік тұрақтанғаннан кейін және Алматы энергия торабы жалпы ұлттық желіге қайта қосылған соң, жарық біртіндеп қайта беріле бастайтыны айтылған.