Павлодар облысында болған қатты дауылдың салдарынан бір тұрғын қайтыс болып, тағы оншақты адам зардап шеккен. 47 нысанға зақым келген, деп хабарлайды Павлодар облысы әкімінің баспасөз қызметіне сілтеме жасаған KAZ.NUR.KZ.

Ведомствоның Telegram-дағы арнасында жарияланған мәлімет бойынша, 19 маусымда Павлодар облысында жылдамдығы секундына 43 метрге дейін жететін дауылды жел тіркелді.

Дауылды жел инфрақұрылымға айтарлықтай зиян келтіріп, электр қуатының өшуіне әкелген және тұрғындар арасында жарақат алу жағдайлары тіркелген.

Төтенше жағдайлар қызметінің мәліметі бойынша, 16 адам зардап шеккен, оның үшеуі – бала. Ақсуда 1968 жылы туған тұрғыны қайтыс болған

Облыс орталығында 47 нысанның, оның ішінде 6 әлеуметтік мекеменің шатырына зақым келген. Ақсу мен Екібастұзда 23 нысан, Баянауыл ауданында 7 нысан бүлінген, сондай-ақ Май және Павлодар аудандарында ғимараттардың зақымдануы тіркелген.

Бұдан бөлек, облыстағы қалалар мен аудандарда электрмен жабдықтау желілерінде ақаулар байқалған.

"Қазіргі уақытта Ақсу қаласында және Баянауыл ауданында электр қуатының өшуі тіркеліп отыр. Болған апаттың салдарын жою бойынша жұмыстар жүргізіліп жатыр. Байланыс және электрмен жабдықтау желілерінің 16 бағанасы қалпына келтірілуде. 300-ден астам адам және 103 бірлік арнайы техника жұмылдырылды. Барлық шұғыл әрекет ету қызметтері күшейтілген режимде жұмыс істеуде", — делінген хабарламада.