Қазіргі таңда тек 40 қызметтік үй болса, барлығының тозығы жеткен, күрделі жөндеуді талап етеді.

Жамбыл облысында орман саласындағы өзекті мәселенің бірі – қызметтік үй мәселесі. Орман орналастыру материалдарына сәйкес, өңірдің орман қоры аумағында 79 дана қызметтік үй болуы тиіс.

Қазіргі таңда тек 40 қызметтік үй болса, барлығының тозығы жеткен, күрделі жөндеуді талап етеді. Осы күнге дейін жөндеу жұмыстарына қаржы бөлінбегендіктен, бүгінде қосымша 39 жаңа қызметтік үй қажеттігі туындап отыр, деп хабарлайды inbusiness.kz сайты.

Жамбыл облысы әкімінің орынбасары Әбілқайыр Тамабектің айтуынша, өңірде орман және жануарлар дүниесін күзетудi, қорғауды, молықтыруды қамтамасыз ету бойынша атқарылып жатқан жұмыстар аз емес.

Дегенмен шешімін күткен мәселелер де жетерлік.

"Облыста орман шаруашылығын жүргізу, жануарлар дүниесін қорғау мен толықтыруды қамтамасыз ету – аса маңызды салалардың бірі. Мемлекет басшысы соңғы жылдары Жолдауларында ағаш егу, елді мекендерді көгалдандыру, экологиялық ахуалды жақсартудың маңыздылығын айрықша атап өтуде. Облыста мемлекеттік орман қоры жерлерінің жалпы көлемі 4,4 миллион гектар болса, оның орман ағаштары көмкерген жерлері 2,3 миллион гектар жерді құрайды. Сол арқылы орман қоры жөнінен облысымыз республикада екінші орынды алып жатыр. Аталған аумақты облыс әкімдігінің табиғи ресурстар және табиғат пайдалануды реттеу басқармасына бағынысты 15 орман шаруашылығы мекемелері мен мамандандырылған "Сапсан" жедел қызметі бақылайды. Аталған мекемелердің материалдық-техникалық базасына келер болсақ, соңғы төрт жылда бұл бағытта 1 миллиардқа жуық қаржы бөлініп, қажетті техникалар мен агрегаттар алынды. Биылғы жылы жергілікті бюджеттен 100 миллион теңге бөлініп, 7 патрульдік автокөлік, 15 дрон мен 40 дана байланыс құралдары алынды. Сонымен қатар өнеркәсіпті дамыту қорынан лизингтік қаржыландыру аясында жалпы құны 1,8 миллиард теңгеге 60 бірлік өрт сөндіру техникаларын сатып алу бойынша жұмыстар жүзеге асырылуда. Бұл орман шаруашылығын өртке қарсы техникалармен 100 пайыз қамтамасыз етуге мүмкіндік береді", — деген Әбілқайыр Тамабек қызметтік үйлердің жетіспеуі және жағдайының нашар болуы жүктелген міндеттерді тиісті деңгейде орындауға мүмкіндік бермейтіндігін атап өтті.