Қазақстандықтардың медициналық қызметтерге жұмсайтын шығындары қалай өсті. Толғырақ Zakon.kz ақпаратында

2025 жылдың бірінші тоқсанының қорытындысы бойынша, инфляцияны есепке алмағандағы медициналық қызметтерге жұмсалған шығындар жылына 28,3%-ға өсті – жан басына шаққанда орташа есеппен 4,6 мың теңге, былтыр бұл көрсеткіш 3,6 мың теңге болған.

Бірінші Кредиттік Бюро мәліметінше, бұл жалпы атаулы ақшалай шығындардың жылдық өсімінен үш есе көп және соңғы екі жылдағы рекорд.

Нақты (инфляцияны ескерген) мәнде өсім 14,9%-ды құрады. Бюро есептеулерде денсаулық сақтау саласындағы қызметтер мен тауарлардың бағалар индексін пайдаланғанын атап өтті, себебі барлық медициналық қызметтерге жеке индикатор берілмеген.

Жан басына шаққандағы шығындардың негізгі бөлігін тіс дәрігерлерінің қызметтері құрайды – 2,4 мың теңге. Бұл өткен жылмен салыстырғанда инфляцияны ескермегенде 26%-ға, ал ескергенде 11,8%-ға көп.

"Аталған абсолюттік сандар тым аз болып көрінуі мүмкін. Алайда бұл есептеулер ел халқының жалпы санына негізделеді. Әлбетте, есептік кезеңде олардың бәрі бірдей мұндай қызметтерге жүгінген жоқ. Сонымен қатар, ресми статистикаға 12 мың үй шаруашылығының деректері енеді, кейін бұл мәліметтер бүкіл елге таратылады", – деп түсіндірді Бірінші Кредиттік Бюро.

Медициналық қызметтерге жұмсалатын шығындардың ең жылдам өсіп жатқан бабы – аурухана қызметтері (күндізгі стационардағы ем және санаторий қызметтері) – жан басына шаққанда орташа 946 теңге. Атаулы өсім – 54,1% жылдық есеппен, нақты өсім – 39,8%.

Дәрігерлер мен бастапқы қабылдауды қамтитын медициналық қызметтерге жұмсалатын орташа шығындар инфляцияны есепке алмағанда 5,7%-ға өсті, ал инфляцияны есепке алғанда керісінше – 5,1%-ға төмендеді. Қазіргі деңгей – 559 теңге.

Парамедициналық қызметтерге (медициналық зертханалар, рентген кабинеттері, медбикелер мен акушерлер қызметтері) жұмсалатын орташа шығындар атаулы мәнде 27,6%-ға, нақты мәнде 11,2%-ға өсіп, 568 теңгені құрады.

Аналитиктер ресми статистикада азаматтардың бейресми денсаулық сақтау шығындары (гүл, сыйлықтар және т.б. сатып алу) да ескерілгенін атап өтті – бұл көрсеткіш жан басына шаққанда орташа 121 теңге, жылдық өсім – 39,1%.