Алматыдағы Назарбаев зияткерлік мектебінен шығып қалған оқушы мектеп бітіру аттестатын алды, деп хабарлайды KAZ.NUR.KZ. Бұл туралы қоғам белсендісі Аида Букаева Facebook желісінде жазды.

Назарбаев зияткерлік мектебіндегі даулы оқиғадан кейін оқудан шығып қалған оқушы қаладағы мектептердің бірін бітіріп, қолына аттестат алды.

"Сүйінші! Сұңқарымыз Қазақстан Республикасының аттестатын алды", — деп жазды қоғам белсендісі Аида Букаева Facebook желісінде.

Аида Букаева оқушыны ертіп алып, екі күн бойы Алматы мектептерін аралап шыққан. Ол кей мектептер оқушыны қабылдаудан бас тартқанын, алайда қыркүйек айында оны 11-сыныпқа қабылдауға дайын мектеп басшылары болғанын айтып, сол мектептерге ризашылығын білдірді.

Осы ретте жазба авторы қоғам тарабынан оқушының ата-анасының жауапсыздығы туралы көп пікір жазылғанын айта кетті.

"Сұңқардың ата-анасы керемет адамдар. Ол отбасында жалғыз бала. Тарихи отанына оралу атасының арманы болған", — дейді ол.

Оның айтуынша, Сұңқар қаладағы № 8 мектептен аттестат алған. Осы ретте Аида Букаева аталған мектептің директоры мен барша мұғаліміне алғыс білдірді.

Сұңқар емтихандарға дайын болмаса да 4 пен 5-ке сәтті тапсырып, 11 сыныпты тәмамдады. Енді 2025 жылғы түлек ретінде ҰБТ-ға өтуін күтіп жүр.

Еске сала кетейік, биыл оқу жылының соңына жақындағанда Назарбаев Зияткерлік мектебінен дау шыққанын хабарлаған едік. НЗМ дербес білім беру ұйымының басқарма төрағасы Ануар Жанғозин жағдайға қатысты пікір білдіріп, даудың неден туғанын түсіндірді. Оның айтуынша, тоқсандық қорытынды бағалау кезінде 11-сынып оқушысы академиялық адалдық ережесін бұзып, емтихан кезінде ұялы телефон қолданған. Телефон тәртіпке сай тәркіленген сәтте оқушы агрессия танытып, мұғалімге бейәдеп сөз айтып, балағаттаған.

Кейін мұғалім мен оқушы дауына қатысты Оқу-ағарту министрлігінің өкілдері ресми пікір білдірді.