Қазір құқық қорғау саласында ер азаматтармен иық тіресе қызмет етіп жүрген қыз-келіншектер аз емес. Мысалы Абай облыстық полиция департаментінде екі мыңнан аса адам жұмыс істесе, соның 322-сі әйел, деп хабарлайды 24kz.

Қиын әрі қауіпті мамандықты серік еткендердің бірі – Сандуғаш Бақытқызы.

Сандуғаш Бақытқызы әкімшілік полиция бөліміне осыдан 6 жыл бұрын келген. Осы уақыт аралығында көптеген істі әшкерелеуге атсалысты. Бала күнінен полицей болып, еліне қызмет етуді армандаған. «Жауапкершілік пен табандылықты қажет ететін жұмыста отбасының қолдауы маңызды», - дейді.

Сандуғаш Бақытқызы, әкімшілік полиция бөлімінің инспекторы:

- Отбасының қолдауы өте маңызды. Менің жолдасым өзі әскери адам, сол салада жұмыс істейді. Өте жақсы қолдады. Соның арқасы деп ойлаймын мен. Қазақта жақсы сөз бар ғой, әйел адам бір қолымен бесікті, бір қолымен әлемді тербетеді дейді. Сондықтан ешқандай қиындығы жоқ.

Сандуғаш күнделікті жол-көлік оқиғасы болған жерге барып материал жинайды. Барлық мәліметті бір жүйеге енгізіп, зерттейді. Содан істі сотқа жолдайды. Қоғамдық жұмыстардан да қалыс қалмайды. Биыл «Көктем аруы-2025» конкурсында жеңімпаз атанған. Әріптестері оны отбасында аяулы жар, кәсіби маман ретінде құрметтейді.

Гүлім Төлепбаева, әкімшілік полиция бөлімінің технигі:

- Сандуғаш жалпы адам ретінде өте ақкөңіл және қарапайым. Басты қасиеті өзіне берілген міндетті абыроймен алып шығу және өжеттілік деп санаймын. Біз онымен мақтанамыз. Көктемді сезіп жатырмыз. Күн жылына бастады. Сондықтан барлық әйелдер қауымын құттықтаймын, әйел бақытын тілеймін.

Абай облысы бойынша Полиция департаментінде 2419 адам жұмыс істейді, оның 322-сі нәзік жанды арулар. Қазір әрқайсысы қоғамның қауіпсіздігі мен тыныштығын қамтамасыз етуге үлес қосып жүр.

Оңдасын Ажытаев, ПД Тәрбие және кадр жұмысы басқармасының бастығы:

- Біздің қатарымыздағы аруларымыз физикалық және психологиялық тұрғыдан дамыған, құқықтық саладағы кәсіби жоғары мамандар деп айта аламын. Мереке қарсаңында ҚР ІІМ және Полиция департаментінің алғыс хаттарымен марапатталып жатыр. Түрлі грамоталармен және ақшалай сыйақылармен. Осы сәтті пайдаланып барша аруларымызды халықаралық әйелдер күнімен құттықтағым келіп тұр.

Полиция қызметкері қырағы, батыл, ұқыпты әрі жылдам жұмыс істеуі қажет. Қызығы мен шыжығы қатар жүретін салада еңбек ететін нәзік жанды арулар жетерлік. Олар қызмет пен отбасын қатар ұстап, өздеріне жүктелген міндетті абыроймен атқарып жүр.

Авторлары: Рүстем Қайратұлы,Берік Жобалайұлы