Мұндай ақпаратты Украина премьер-министрі Денис Шмыгаль Telegram арнасында жазды.

Оның сөзінше, Украина G7 бастамасы аясында Ресейдің бұғатталған активтерінің кірісімен қамтамасыз етілген Ұлыбританиядан алғашқы траншты алған, деп хабарлайды inbusiness.kz сайты.

Аталған жаңалықты Deutsche Welle басылымы да таратып отыр. Денис Шмыгаль ол қаржы қорғанысты күшейтуге бағытталатынын жеткізді.

– Бүгін біз G7 ERA бастамасы аясында 752 миллион фунт алдық. Бұл қаражатты Украинаның қорғаныс қабілетін нығайтуға бағыттаймыз, – деді ол.

Украина премьер-министрі Ұлыбритания үкіметі мен G7 серіктестеріне ресейлік активтерді өз елінің пайдасына мәжбүрлейтін механизм үшін алғыс білдірді.

– Біз болашақта Ресейдің барлық егеменді активтері тәркіленіп, еліміздің игілігіне берілетініне үміттенеміз, – деп қоса кетті Шмыгаль.

Deutsche Welle мәліметінше, бұл шешімге жауап ретінде Ресей билігі Ұлыбританияға тиесілі мүлікті тәркілеу туралы ескерту жасаған.

Лондон бөлген қаражат Extraordinary Revenue Acceleration for Ukraine (ERA) бағдарламасының бір бөлігі саналады. Оның аясында G7 елдері Украинаға жалпы сомасы 50 миллиард доллар көлемінде несие береді, бұл несие Батыста бұғатталған Ресей Орталық банкінің активтерінен түскен табыспен өтеледі.

1 наурызда Ұлыбритания мен Украина 2,26 миллиард фунт стерлинг (шамамен 2,74 миллиард еуро) көлемінде несие беру туралы келісімге қол қойған еді. Бұл қаражат Украинаға Ресей агрессиясына қарсы тұру үшін әскери жабдықтар сатып алуға жұмсалады. Несие санкцияға іліккен ресейлік мемлекеттік активтерден түскен кіріс есебінен өтелмек.