Қазақстанда киік етін өңдеумен айналысқысы келетін инвесторлар табылған. Бұл туралы экология және табиғи ресурстар министрі Ерлан Нысанбаев мәлімдеді, — деп хабарлайды Massaget.kz тілшісі.

Үкіметтегі брифинг барысында министр алты компания қызығушылық танытқанын айтты.

"Әкімдіктермен бірлесіп, киік етін өңдейтін ет комбинаттарын құру жөніндегі инвестициялық жобаларға қатысты мәселелерді пысықтап жатырмыз. Бүгінде алты компания қызығушылық танытып отыр", — деді ол.

Ерлан Нысанбаевтың сөзінше, киік санын реттеу бойынша ресми ғылыми негіздеме алынған. Қазір ұйымдастыру мәселелері талқыланып жатыр.

"Менің ойымша, бір-екі күн ішінде шешімді жариялаймыз. Ғылыми негіздеме жалпы популяцияның 20 пайызын алуды ұсынып отыр. Бүгінде ресми есеп қорытындысы бойынша олардың саны — 3,9 миллион бас. Оның ішінде 2,3 миллионы – Орал популяциясы, 1,6 миллионы – Бетпақдала популяциясы және 78 мыңы – Үстірт популяциясы", – деп түсіндірді шенеунік.

Еске салайық, бұған дейін Қазақстан Қытайға киік популяциясын қалпына келтіруге көмектесетіні хабарланды.

Өзекті жаңалықтарды өз уақытында оқу үшін Facebook парақшамызға жазылыңыз!