Астана қаласында Sergek бейнебақылау жүйесімен біріктірілген дрондар алғашқы сынақтан өтуде, деп хабарлайды El.kz интернет порталы Sergek Group компаниясының коммуникациялар және маркетинг департаментіне сілтеме жасап.

Пилоттық жобаға Қазақстан Республикасы Ішкі істер министрлігі, "Қазақтелеком" АҚ және Sergek Group IT-компаниясы қатысып отыр. Жаңа технология жол қозғалысы ережелерінің бұзылуын нақты уақыт режимінде анықтауға, іздеуде жүрген көліктерді тануға және тиісті ақпаратты жерде жүрген полиция экипаждарына жедел жеткізуге мүмкіндік береді.

Ішкі істер министрлігінің ақпараттандыру департаментінің басшысы Сергей Варгоның айтуынша, Sergek жүйесімен жабдықталған дрондарды пайдалану апаттылық деңгейін төмендетіп, жол қозғалысы тәртібін күшейтуге септігін тигізеді.

"Қазақтелеком" басқарма төрағасы Бағдат Мусин дрондардың табиғи құбылыстарды бақылау мен қоғамдық тәртіпті сақтау салаларында белсенді қолданылып жатқанын, ал болашақта олардың цифрлық инфрақұрылымдағы маңызы арта түсетінін атап өтті.

Сынақ аясында бірнеше сценарий сыналады: көше патрульдеу, бағыттама бойынша күдікті көлікті нақты іздеу және т.б. Егер пилоттық жоба тиімділігін дәлелдесе, ол еліміздің өзге өңірлерінде де енгізілетін болады.

Sergek Group компаниясының бас директоры Евгений Ким бұл жобаны қазақстандық инновациялық технологияларды ұлттық қауіпсіздік жүйесіне нақты енгізудің жарқын мысалы ретінде атады.

Бқған дейін Шымкентте 1500 бейнебақылау камералары орнатылғаны туралы жазған едік.